ലൂസിഫർ, കുരുതി തുടങ്ങിയ ചിത്രങ്ങൾക്ക് ശേഷം പൃഥ്വിരാജ് സുകുമാരനും പാർവതി തിരുവോത്തും വീണ്ടും ഒന്നിക്കുന്ന ‘ഐ നോബഡി’ എന്ന ബിഗ് ബജറ്റ് ചിത്രം ഈ വ്യാഴാഴ്ച (ജൂലൈ 9) തിയറ്ററുകളിൽ റിലീസ് ചെയ്യും. മമ്മൂട്ടി ചിത്രം ‘റോഷാക്കി’ലൂടെ സിനിമാപ്രേമികളെ ഞെട്ടിച്ച നിസാം ബഷീർ സംവിധാനം ചെയ്യുന്ന ഈ ചിത്രം ബാങ്ക് മോഷണ പശ്ചാത്തലത്തിലുള്ള ഒരു ഹെയ്സ്റ്റ് ഴോണർ ത്രില്ലറാണെന്നാണ് ട്രെയിലർ നൽകുന്ന സൂചന. റോഷാക്ക്, ഇബിലീസ് എന്നീ ചിത്രങ്ങൾക്ക് തിരക്കഥയൊരുക്കിയ സമീർ അബ്ദുളാണ് ഈ ചിത്രത്തിന്റെയും രചന നിർവഹിച്ചിരിക്കുന്നത്. ഹക്കിം ഷാജഹാൻ, അശോകൻ, വിജയരാഘവൻ, നിഷാന്ത് സാഗർ, ഖാലിദ് റഹ്മാൻ, സഞ്ജു ശിവറാം, സുധി കോപ്പ തുടങ്ങി മലയാളത്തിലെ വൻ താരനിര തന്നെ അണിനിരക്കുന്ന ചിത്രമാണിത്.
പൃഥ്വിരാജ് പ്രൊഡക്ഷൻസിന്റെയും ഇ4 എക്സ്പെരിമെന്റ്സിന്റെയും ബാനറുകളിൽ സുപ്രിയ മേനോൻ, മുകേഷ് ആർ മേത്ത, സി വി സാരഥി എന്നിവർ ചേർന്ന് നിർമ്മിക്കുന്ന ചിത്രത്തിന് ജേക്സ് ബിജോയാണ് സംഗീതമൊരുക്കുന്നത്. ആകെ എട്ട് ഗാനങ്ങളുള്ള ചിത്രത്തിലെ “ആന്തം ഓഫ് നോബഡി” എന്ന റാപ്പ് ഗാനം ഇതിനോടകം തന്നെ സോഷ്യൽ മീഡിയയിൽ സൂപ്പർഹിറ്റാണ്. ബോളിവുഡ് ഗായകൻ സുധീർ യദുവംശി, ബിജോൺ, സിമ്രാൻ കൗർ എന്നിവർ ആലപിച്ച ഈ ഗാനത്തിന് വരികൾ കുറിച്ചിരിക്കുന്നത് സിദ് കൗശലാണ്. എന്ന് നിന്റെ മൊയ്തീൻ, കൂടെ എന്നീ ഹിറ്റ് ചിത്രങ്ങൾക്ക് ശേഷം പൃഥ്വിരാജ്-പാർവതി കൂട്ടുകെട്ട് വീണ്ടും ഒന്നിക്കുന്നു എന്നതും റോഷാക്കിന് ശേഷമുള്ള നിസാം ബഷീറിന്റെ ചിത്രം എന്നതുമാണ് സിനിമയുടേതായി പുറത്തുവരുന്ന പ്രധാന ആകർഷണങ്ങൾ.
