ടെഹ്‌റാൻ: ഇസ്രയേൽ ആക്രമണത്തിൽ കൊല്ലപ്പെട്ടുവെന്ന ശക്തമായ അഭ്യൂഹങ്ങൾ നിലനിൽക്കുന്നതിനിടെ, ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്‌സ് (ഐആർജിസി) മുതിർന്ന കമാൻഡർ അഹമ്മദ് വാഹിദി പൊതുവേദിയിൽ പ്രത്യക്ഷപ്പെട്ടു. ഇറാന്റെ പരമോന്നത നേതാവായിരുന്ന ആയത്തുള്ള അലി ഖമനയിയുടെ സംസ്‌കാര ചടങ്ങുകളിൽ പങ്കെടുക്കാനാണ് അദ്ദേഹം നേരിട്ടെത്തിയത്. കഴിഞ്ഞ ഫെബ്രുവരി എട്ടിന് ശേഷം ആദ്യമായാണ് വാഹിദി പൊതുമധ്യത്തിൽ വരുന്നത്. വ്യാഴാഴ്ച നടന്ന ശവസംസ്‌കാര ആസൂത്രണ യോഗത്തിൽ പങ്കെടുത്ത അദ്ദേഹം, തുടർന്ന് ഖമനയിയുടെ ഭൗതികശരീരത്തിന് സമീപമെത്തി ആദരാഞ്ജലികൾ അർപ്പിച്ചു. വാഹിദി ചടങ്ങുകളിൽ പങ്കെടുക്കുന്നതിന്റെ ചിത്രങ്ങൾ ഇറാൻ ഔദ്യോഗിക മാധ്യമങ്ങൾ പുറത്തുവിട്ടിട്ടുണ്ട്. വരും ദിവസങ്ങളിൽ രാജ്യത്ത് നടക്കാനിരിക്കുന്ന വിപുലമായ സംസ്‌കാര ചടങ്ങുകളുടെ ക്രമീകരണങ്ങൾക്ക് അദ്ദേഹം തന്നെയാണ് സജീവമായി നേതൃത്വം നൽകുന്നത്.
ഐആർജിസിയിൽ ദീർഘകാലത്തെ പ്രവർത്തന പരിചയമുള്ള അഹമ്മദ് വാഹിദി ഇറാന്റെ പ്രതിരോധ മേഖലയിലെ ഏറ്റവും സ്വാധീനമുള്ളതും ശക്തനുമായ വ്യക്തിയായാണ് വിലയിരുത്തപ്പെടുന്നത്. എലൈറ്റ് ഖുദ്‌സ് ഫോഴ്‌സിന്റെ മുൻ തലവനായും രാജ്യത്തിന്റെ പ്രതിരോധ, ആഭ്യന്തര മന്ത്രിയായും അദ്ദേഹം സേവനമനുഷ്ഠിച്ചിട്ടുണ്ട്. ആയത്തുള്ള അലി ഖമനയി ഉൾപ്പെടെയുള്ള ഇറാന്റെ മുൻനിര നേതാക്കൾ വിവിധ ആക്രമണങ്ങളിൽ കൊല്ലപ്പെട്ടതിനെ തുടർന്ന് വാഹിദിയെ ഐആർജിസിയുടെ തലവനായി ഉയർത്തിയിരുന്നു. ഇസ്രയേൽ ആക്രമണത്തിൽ വാഹിദിയും വധിക്കപ്പെട്ടെന്ന തരത്തിൽ രാജ്യാന്തര തലത്തിൽ പ്രചരിച്ച വാർത്തകൾ തെറ്റാണെന്ന് തെളിയിക്കുന്നതാണ് അദ്ദേഹത്തിന്റെ പുതിയ പൊതുവേദിയിലെ സാന്നിധ്യം.
