ബംഗളൂരു: ‘ചാർളി 777’, ‘കിരിക് പാർട്ടി’, ‘സപ്ത സാഗരദാച്ചേ എല്ലോ’ തുടങ്ങിയ സൂപ്പർഹിറ്റ് ചിത്രങ്ങളിലൂടെ മലയാളി സിനിമാപ്രേമികളുടെ ഉൾപ്പെടെ പ്രിയങ്കരനായി മാറിയ കന്നഡ നടൻ രക്ഷിത് ഷെട്ടിയുടെ ദീർഘനാളത്തെ അപ്രത്യക്ഷമാകലിന് പിന്നിലെ രഹസ്യം വെളിപ്പെടുത്തി പ്രമുഖ സംഗീത സംവിധായകനും അദ്ദേഹത്തിന്റെ അടുത്ത സുഹൃത്തുമായ അജനീഷ് ലോകനാഥ്. കഴിഞ്ഞ കുറച്ചുകാലമായി സോഷ്യൽ മീഡിയയിലോ പൊതുവേദികളിലോ രക്ഷിത് ഷെട്ടിയെ കാണാത്തതിനെ തുടർന്ന്, താരം എവിടെയാണെന്ന് സുഹൃത്തുക്കളോടും സോഷ്യൽ മീഡിയ പേജുകളിലും ആരാധകർ നിരന്തരം തിരക്കുന്നുണ്ടായിരുന്നു. ഇതിനെല്ലാം മറുപടിയുമായാണ് അജനീഷ് ഇപ്പോൾ രംഗത്തെത്തിയിരിക്കുന്നത്. രണ്ടു മൂന്ന് മാസങ്ങൾക്ക് മുൻപ് താൻ രക്ഷിതിനെ നേരിട്ട് കണ്ടിരുന്നുവെന്നും അദ്ദേഹം പൂർണ്ണമായും തന്റെ പുതിയ ചിത്രത്തിന്റെ എഴുത്തുമായി ബന്ധപ്പെട്ട തിരക്കുകളിലാണെന്നും അജനീഷ് വ്യക്തമാക്കി. താൻ എവിടെപ്പോയാലും ആളുകൾ രക്ഷിതിനെക്കുറിച്ച് മാത്രമാണ് ചോദിക്കാറുള്ളതെന്ന് അദ്ദേഹത്തോട് സംസാരിച്ചിട്ടുണ്ടെന്നും തങ്ങൾ അത്രയും അടുത്ത സുഹൃത്തുക്കളായതിനാൽ തങ്ങൾ തമ്മിൽ യാതൊരു ബന്ധവുമില്ലെന്ന് പറയുക അസാധ്യമാണെന്നും അദ്ദേഹം കൂട്ടിച്ചേർത്തു.മറ്റുള്ളവരിൽ നിന്ന് തികച്ചും വ്യത്യസ്തമായ ഒരു ചിന്താഗതിയാണ് രക്ഷിത് ഷെട്ടിക്കുള്ളതെന്നും അദ്ദേഹത്തിന്റെ ജീവിതവും സിനിമയും രണ്ടും രണ്ടല്ല, ഒന്നാണെന്നും അജനീഷ് ലോകനാഥ് പറയുന്നു. തന്റെ സ്വന്തം അനുഭവങ്ങളിൽ നിന്നാണ് അദ്ദേഹം കഥകൾ രൂപപ്പെടുത്തുന്നത്. അതുകൊണ്ടുതന്നെ അദ്ദേഹത്തിന്റെ കാഴ്ചപ്പാടുകൾ ഏറെ വ്യത്യസ്തമാണ്. തികച്ചും ആത്മീയമായ ഒരു ചിന്താഗതിയോടെ സിനിമയെ ആരാധിക്കുന്ന ആളാണ് അദ്ദേഹം. സിനിമ ചെയ്യുന്നതിനായി അദ്ദേഹത്തിന്റേതായ പ്രത്യേക ശൈലിയും ശക്തമായ ആശയങ്ങളുമുണ്ട്. പുതിയ പ്രോജക്ടിനായി ഇത്രയധികം സമയമെടുക്കുന്നതും അതുകൊണ്ടാണ്. അദ്ദേഹത്തിന്റെ പുതിയ കഥയുടെ ചില ഭാഗങ്ങൾ താൻ കേട്ടിട്ടുണ്ടെന്നും സിനിമയെ സമീപിക്കുന്ന അദ്ദേഹത്തിന്റെ ശൈലി വേറിട്ടതാണെന്നും അജനീഷ് വെളിപ്പെടുത്തി. എന്തായാലും രക്ഷിത് ഷെട്ടി ഉടൻ തന്നെ ശക്തമായ ഒരു തിരിച്ചുവരവ് നടത്തുമെന്നും അത് ഇന്ത്യൻ സിനിമയിലെ തന്നെ ഒരു വലിയ വരവായിരിക്കുമെന്നും ആരാധകർക്ക് ഉറപ്പുനൽകിക്കൊണ്ട് അജനീഷ് ലോകനാഥ് വാക്കുകൾ അവസാനിപ്പിച്ചു.
