ബ്യൂണസ് ഐറിസ്/ലിസ്ബൺ: ഫുട്ബോൾ ലോകം ഏറെ ആകാംഷയോടെ കാത്തിരിക്കുന്ന ലയണൽ മെസിയും ക്രിസ്റ്റ്യാനോ റൊണാൾഡോയും തമ്മിലുള്ള ലോകകപ്പ് നേർക്കുനേർ പോരാട്ടം കലാശപ്പോരാട്ടത്തിൽ മാത്രമേ സാധ്യമാകൂ എന്ന് നിലവിലുള്ള ഫിഫ ഫിക്സ്ചറുകൾ വ്യക്തമാക്കുന്നു. ഗ്രൂപ്പ് ഘട്ട മത്സരങ്ങൾ പൂർത്തിയായതോടെ നിലവിലുണ്ടായിരുന്ന സമവാക്യങ്ങൾ മാറിയതാണ് ഫൈനലിന് മുൻപ് ഇരുടീമുകളും തമ്മിൽ ഏറ്റുമുട്ടാനുള്ള സാധ്യതകൾക്ക് മങ്ങലേൽപ്പിച്ചത്. കഴിഞ്ഞ ദിവസം നടന്ന കൊളംബിയക്കെതിരായ നിർണ്ണായക മത്സരത്തിൽ പോർച്ചുഗൽ ഗോൾരഹിത സമനിലയിൽ കുരുങ്ങിയിരുന്നു. ഇതോടെ പോയിന്റ് പട്ടികയിൽ രണ്ടാം സ്ഥാനക്കാരായി ഫിനിഷ് ചെയ്യേണ്ടി വന്ന പോർച്ചുഗൽ, റൗണ്ട് ഓഫ് 32 ലേക്ക് യോഗ്യത നേടിയിരിക്കുന്നത് മറ്റൊരു റൂട്ടിലാണ്. മറുവശത്ത് തങ്ങളുടെ ഗ്രൂപ്പിൽ ചാമ്പ്യന്മാരായി കരുത്ത് കാട്ടിയ അർജന്റീന പ്രീക്വാർട്ടർ പോരാട്ടത്തിൽ കേപ് വെർദെയുമായി കൊമ്പുകോർക്കാൻ പൂർണ്ണ സജ്ജരായിക്കഴിഞ്ഞു.നിലവിലെ നോക്കൗട്ട് ഘട്ട ക്രമീകരണങ്ങൾ പരിശോധിച്ചാൽ ഫൈനലിന് മുൻപുള്ള ഒരു ഘട്ടത്തിലും അർജന്റീനയ്ക്കും പോർച്ചുഗലിനും നേർക്കുനേർ വരാൻ സാധിക്കാത്ത വിധമാണ് ഫിക്സ്ചറുകൾ വന്നിട്ടുള്ളത്. ഇരുടീമുകളുടെയും ഇതിഹാസ താരങ്ങളായ മെസിയും റൊണാൾഡോയും തമ്മിലുള്ള ഒരു ലോകകപ്പ് പോരാട്ടം കാണാൻ കൊതിക്കുന്ന ആരാധകർക്ക് ഈ ഫിക്സ്ചർ ഘടന ചെറുതല്ലാത്ത നിരാശയാണ് സമ്മാനിക്കുന്നത്. ഇനി ഏതൊക്കെ സമവാക്യങ്ങൾ പരിശോധിച്ചാലും ഈ ഇതിഹാസങ്ങൾ തമ്മിലുള്ള കളി നടക്കണമെങ്കിൽ ഇരുടീമുകളും തങ്ങളുടെ മുന്നിലുള്ള എല്ലാ നോക്കൗട്ട് മത്സരങ്ങളും ജയിച്ചുകയറി ലോകകപ്പിന്റെ കലാശപ്പോരിൽ ഒരേസമയം എത്തേണ്ടതുണ്ട്. അങ്ങനെയൊരു സ്വപ്ന ഫൈനൽ യാഥാർത്ഥ്യമായാൽ മാത്രമേ ലോകകപ്പ് വേദിയിലെ മെസി-റോണോ പോരിന് ആരാധകർക്ക് സാക്ഷ്യം വഹിക്കാനാകൂ.
