തൃശ്ശൂർ: തെരുവ് നായ ശല്യം കടുത്ത ഭീഷണിയായതിനെ തുടർന്ന് സ്കൂൾ പ്രവർത്തനങ്ങൾ സ്തംഭിക്കുകയും ഒടുവിൽ വിദ്യാർത്ഥികളുടെ സുരക്ഷ മുൻനിർത്തി സ്കൂളിന് അവധി പ്രഖ്യാപിക്കുകയും ചെയ്തു. തൃശ്ശൂർ ചൂണ്ടൽ ഗവൺമെന്റ് യു പി സ്കൂളിനാണ് അധികൃതർ ഇന്ന് അടിയന്തര അവധി നൽകിയത്. സ്കൂളിനോട് ചേർന്നുള്ള മിനി ഓഡിറ്റോറിയത്തിലെ മുറിയിൽ തെരുവ് നായ പ്രസവിച്ചു കിടക്കുന്നതാണ് നിലവിലെ പ്രതിസന്ധിക്ക് കാരണം. ഈ നായയ്ക്ക് നാല് കുഞ്ഞുങ്ങളുമുണ്ട്. കഴിഞ്ഞ ദിവസം സ്കൂളിലേക്ക് വരികയായിരുന്ന ഒരു വിദ്യാർത്ഥിയെ തെരുവ് നായ കടിച്ചതോടെയാണ് പ്രദേശത്ത് ഭീതി പടർന്നത്. പിന്നീട് ഈ നായയെ ചത്ത നിലയിൽ കണ്ടെത്തുകയും തുടർന്ന് നടത്തിയ വിദഗ്ധ പരിശോധനയിൽ നായയ്ക്ക് പേവിഷബാധയുണ്ടായിരുന്നതായി സ്ഥിരീകരിക്കുകയും ചെയ്തു.
ഇതോടെ സ്കൂൾ പരിസരമാകെ പേവിഷബാധയുള്ള നായ്ക്കളുടെ ഭീഷണിയിലാണെന്ന ആശങ്കയിലാണ് നാട്ടുകാരും അധികൃതരും. നിലവിൽ വിദ്യാർത്ഥികൾക്കും അധ്യാപകർക്കും ഒട്ടും ഭയമില്ലാതെ സ്കൂളിലേക്ക് വരാൻ കഴിയാത്ത അതീവ ഗുരുതരമായ സാഹചര്യമാണ് ചൂണ്ടലിലുള്ളത്. തെരുവ് നായ ശല്യം കാരണം കുട്ടികളുടെ ജീവൻ തന്നെ അപകടത്തിലാകുന്ന അവസ്ഥ വന്നതോടെ സ്കൂൾ അധികൃതരും പ്രദേശവാസികളും പഞ്ചായത്തിന് പരാതി നൽകുകയായിരുന്നു. പരാതിയെ തുടർന്ന് പഞ്ചായത്ത് പ്രസിഡന്റ് നേരിട്ട് സ്കൂൾ പരിസരത്ത് എത്തി സ്ഥിതിഗതികൾ വിലയിരുത്തി. നിലവിൽ പ്രസവിച്ചു കിടക്കുന്ന നായയെയും കുഞ്ഞുങ്ങളെയും സുരക്ഷിതമായി പിടിച്ച് മറ്റൊരിടത്തേക്ക് മാറ്റാനാണ് അധികൃതർ ഇപ്പോൾ ആലോചിക്കുന്നത്. നായകളെ മാറ്റിയ ശേഷം മാത്രമേ സ്കൂളിന്റെ പ്രവർത്തനം സുരക്ഷിതമായി പുനരാരംഭിക്കാൻ സാധിക്കൂ എന്ന നിലപാടിലാണ് നാട്ടുകാർ.
