സൗദി അറേബ്യയിലെ ജയിലിൽ രണ്ട് പതിറ്റാണ്ടായി കഴിയുന്ന കോഴിക്കോട് ഫറോക്ക് സ്വദേശി അബ്ദുറഹീം ഉടൻ ജയിൽമോചിതനായി നാട്ടിലേക്ക് മടങ്ങും. വധശിക്ഷയ്ക്ക് വിധിക്കപ്പെട്ട അബ്ദുറഹീമിനായി ലോകമെമ്പാടുമുള്ള മലയാളികൾ കൈകോർത്ത് സമാഹരിച്ച 15 മില്യൺ റിയാൽ (ഏകദേശം 47 കോടി രൂപ) ദിയാധനമായി നൽകിയതോടെയാണ് അദ്ദേഹത്തിന് പുതുജീവൻ ലഭിച്ചത്. കൊല്ലപ്പെട്ട സൗദി ബാലന്റെ കുടുംബം മാപ്പ് നൽകിയതിനെത്തുടർന്ന് വധശിക്ഷ റദ്ദാക്കപ്പെട്ടിരുന്നു. ഇതിനുപിന്നാലെ പൊതു അവകാശ നിയമപ്രകാരം കോടതി വിധിച്ച 20 വർഷത്തെ തടവുശിക്ഷാ കാലാവധി മെയ് 20-ഓടെ പൂർത്തിയാകുകയാണ്. 2006 ഡിസംബറിൽ സ്പോൺസറുടെ ഭിന്നശേഷിക്കാരനായ മകനെ വാഹനത്തിനുള്ളിൽ വെച്ച് കൊലപ്പെടുത്തി എന്ന കുറ്റാരോപിതനായാണ് അബ്ദുറഹീം ജയിലിലായത്.
റിയാദ് ജയിലിലെ നീണ്ട കാലത്തെ തടവ് ജീവിതം അവസാനിക്കുന്നതോടെ മോചനത്തിനായുള്ള അവസാനഘട്ട നടപടികൾ റിയാദിലെ നിയമ സഹായ സമിതിയും ഇന്ത്യൻ എംബസിയും ചേർന്ന് വേഗത്തിലാക്കി വരികയാണ്. 2025 മെയ് മാസത്തിൽ പുറപ്പെടുവിച്ച അന്തിമ വിധിയുടെ അടിസ്ഥാനത്തിൽ നിശ്ചയിക്കപ്പെട്ട ശിക്ഷാ കാലാവധി പൂർത്തിയാകുന്നതോടെ നിയമനടപടികൾ പൂർത്തിയാക്കി അബ്ദുറഹീം വൈകാതെ ജന്മനാട്ടിലേക്ക് തിരിക്കും. മനുഷ്യസ്നേഹത്തിന്റെ ഉത്തമ ഉദാഹരണമായി മാറിയ ഈ മോചന വാർത്ത ഏറെ ആശ്വാസത്തോടെയാണ് പ്രവാസി സമൂഹവും കേരളവും നോക്കിക്കാണുന്നത്. രണ്ട് പതിറ്റാണ്ടിന്റെ കഠിനമായ കാത്തിരിപ്പിനും പ്രാർത്ഥനകൾക്കും വിരാമമിട്ട് അബ്ദുറഹീം സ്വന്തം മണ്ണിലേക്ക് കാലുകുത്തുന്ന നിമിഷത്തിനായുള്ള കാത്തിരിപ്പിലാണ് ബന്ധുക്കളും സുഹൃത്തുക്കളും.
