കായിക ലോകത്തെ വമ്പൻ മാമാങ്കങ്ങൾക്ക് വേദിയാകാനൊരുങ്ങി ഇന്ത്യ. 2038-ലെ ഏഷ്യൻ ഗെയിംസ് ആതിഥേയത്വത്തിനായി ഇന്ത്യൻ ഒളിമ്പിക് അസോസിയേഷൻ (IOA) ഏഷ്യൻ ഒളിമ്പിക് കൗൺസിലിന് ഔദ്യോഗികമായി താൽപ്പര്യപത്രം സമർപ്പിച്ചു. ചൈനയിൽ നടന്ന ഏഷ്യൻ കൗൺസിൽ യോഗത്തിൽ ഇന്ത്യയുടെ ഈ താൽപ്പര്യം ഗൗരവകരമായി ചർച്ച ചെയ്യപ്പെട്ടു. ദക്ഷിണ കൊറിയയും ഈ വലിയ കായിക മേളയ്ക്കായി രംഗത്തുണ്ടെന്നത് ഇന്ത്യയുടെ പോരാട്ടം കടുപ്പിക്കും. നിലവിൽ അഹമ്മദാബാദ് മുഖ്യ വേദിയാക്കി 2030-ലെ കോമൺവെൽത്ത് ഗെയിംസ് നടത്താനുള്ള തയ്യാറെടുപ്പിലാണ് രാജ്യം. ഇതിന് പിന്നാലെ 2036-ലെ ഒളിമ്പിക്സിനും തുടർന്ന് 2038-ലെ ഏഷ്യൻ ഗെയിംസിനും കൂടി വേദിയാകാനാണ് ഇന്ത്യ ലക്ഷ്യമിടുന്നത്.
2026-ൽ ജപ്പാനിലും 2030-ൽ സൗദി അറേബ്യയിലും 2034-ൽ ദോഹയിലും ഏഷ്യൻ ഗെയിംസ് നടക്കുമെന്ന് നേരത്തെ തന്നെ ഉറപ്പിച്ചിട്ടുണ്ട്. അതിനാൽ അടുത്ത ഊഴത്തിനായി ഇന്ത്യ സജീവമായി തന്നെ രംഗത്തുണ്ട്. ഇത്തരം മെഗാ കായിക ഇവന്റുകൾക്ക് വേദിയാകുന്നത് രാജ്യത്തെ സ്റ്റേഡിയങ്ങളുടെ നിലവാരം ഉയർത്താനും മറ്റ് അടിസ്ഥാന സൗകര്യങ്ങൾ രാജ്യാന്തര തലത്തിലേക്ക് വികസിപ്പിക്കാനും വലിയ അവസരം നൽകും. ഒളിമ്പിക്സ് ഉൾപ്പെടെയുള്ള ലക്ഷ്യങ്ങളിലേക്ക് നീങ്ങുന്ന ഇന്ത്യക്ക് ഏഷ്യൻ ഗെയിംസ് ആതിഥേയത്വം ലഭിക്കുന്നത് കായിക ഭൂപടത്തിൽ വലിയ കരുത്താകും.
