പുതിയ യുഡിഎഫ് മന്ത്രിസഭയുടെ സത്യപ്രതിജ്ഞ പൂർത്തിയായതിന് പിന്നാലെ, മലബാറിലെ പ്രമുഖ ജില്ലയായ കോഴിക്കോടിനെ പൂർണ്ണമായും അവഗണിച്ചതിനെതിരെ മുന്നണിയിൽ പരസ്യ പ്രതിഷേധം പുകയുന്നു. കോഴിക്കോട്ടെ മുസ്ലിം ലീഗ് സംസ്ഥാന കമ്മിറ്റി ഓഫീസായ ലീഗ് ഹൗസിന് മുന്നിൽ ഇന്ന് കരിങ്കൊടിയും നേതൃത്വത്തെ നേരിട്ട് ചോദ്യം ചെയ്യുന്ന തരത്തിലുള്ള പോസ്റ്ററുകളും പ്രത്യക്ഷപ്പെട്ടു. നിയമസഭാ തിരഞ്ഞെടുപ്പിൽ 13-ൽ 12 സീറ്റുകളും സമ്മാനിച്ച് യുഡിഎഫിന് ചരിത്ര വിജയം നേടിത്തന്ന കോഴിക്കോട് ജില്ലയ്ക്ക് മന്ത്രിസഭയിൽ ഒരൊറ്റ പ്രതിനിധിയെപ്പോലും നൽകാത്തതാണ് അണികളെയും പ്രാദേശിക നേതാക്കളെയും ചൊടിപ്പിച്ചത്. കോഴിക്കോടിന്റെ അയോഗ്യത എന്താണെന്നും, ജില്ലയെ ഒന്നടങ്കം തഴയാൻ മാത്രം വി.ഇ. അബ്ദുൾ ഗഫൂറിന് എന്ത് മെറിറ്റാണുള്ളതെന്നും പോസ്റ്ററുകളിൽ ചോദ്യമുയരുന്നുണ്ട്. കോഴിക്കോടിന് പുറമെ വടക്കൻ മലബാറിലെ കാസർഗോഡ് ജില്ലയെയും പുതിയ മന്ത്രിസഭയിൽ നിന്ന് പൂർണ്ണമായി ഒഴിവാക്കിയതിനെതിരെ പ്രതിഷേധം ശക്തമാണ്.
മന്ത്രിസ്ഥാനത്തേക്ക് ലീഗിൽ നിന്ന് പാറക്കൽ അബ്ദുള്ളയുടെയും കോൺഗ്രസിൽ നിന്ന് കെ. ജയന്തിന്റെയും പേരുകൾ സജീവമായി പരിഗണിച്ചിരുന്നെങ്കിലും അവസാന നിമിഷം ഇരുവരും പട്ടികയ്ക്ക് പുറത്താവുകയായിരുന്നു. നിലവിലെ ധാരണപ്രകാരം ടേം വ്യവസ്ഥയിൽ രണ്ടര വർഷത്തിന് ശേഷം മാത്രമേ പാറക്കൽ അബ്ദുള്ളയ്ക്ക് മന്ത്രിസഭയിലേക്ക് വരാൻ സാധിക്കൂ എന്നതും അണികളിലെ അമർഷം വർദ്ധിപ്പിച്ചു. ജില്ലയിൽ നിന്ന് മിന്നും വിജയം നേടിയിട്ടും അർഹമായ പ്രാതിനിധ്യം ഉറപ്പാക്കാൻ ലീഗ്-കോൺഗ്രസ് നേതൃത്വങ്ങൾക്ക് സാധിച്ചില്ലെന്നാണ് ഉയരുന്ന പ്രധാന വിമർശനം. കഴിഞ്ഞ ദിവസം കോൺഗ്രസ് അനുകൂല തൊഴിലാളി സംഘടനയായ ഐഎൻടിയുസിയും ഇതേ അവഗണനയ്ക്കെതിരെ കോഴിക്കോട് നഗരത്തിൽ പരസ്യമായി തെരുവിലിറങ്ങി പ്രതിഷേധിച്ചിരുന്നു. വരും ദിവസങ്ങളിൽ ഈ പ്രാദേശിക അതൃപ്തി പുതിയ സർക്കാരിനും മുന്നണി നേതൃത്വത്തിനും വലിയ തലവേദനയാകാനാണ് സാധ്യത.
