അനധികൃത സ്വത്ത് സമ്പാദന കേസിൽ മുൻ ഡി.ജി.പി ടോമിൻ തച്ചങ്കരിക്ക് നാല് വർഷം കഠിനതടവ് വിധിച്ച നടപടിയെ സ്വാഗതം ചെയ്ത് മുൻ ഡി.ജി.പി ടി.പി സെൻകുമാർ രംഗത്തെത്തി. ‘പലനാൾ കള്ളൻ ഒരുനാൾ പിടിയിൽ’ എന്ന് പ്രതികരിച്ച അദ്ദേഹം, വിജിലൻസ് കോടതിയുടെ വിധി തികച്ചും മാതൃകാപരമാണെന്ന് വ്യക്തമാക്കി. ടോമിൻ തച്ചങ്കരിക്കെതിരെ താൻ തന്നെ എട്ടോളം അന്വേഷണങ്ങൾ നടത്തി റിപ്പോർട്ടുകൾ സമർപ്പിച്ചിരുന്നെങ്കിലും, സാമുദായികവും രാഷ്ട്രീയവുമായ സ്വാധീനങ്ങൾ കാരണം മുൻപ് നടപടികളൊന്നും ഉണ്ടായിരുന്നില്ലെന്ന് സെൻകുമാർ ആരോപിച്ചു. എന്നാൽ, സമ്മർദ്ദങ്ങൾക്കും സ്വാധീനങ്ങൾക്കും വഴങ്ങാതെ കേസ് നടപ്പിലാക്കിയ പ്രോസിക്യൂട്ടർമാർക്കും അന്വേഷണ ഉദ്യോഗസ്ഥർക്കും അഭിനന്ദനം അറിയിച്ച അദ്ദേഹം, നിലവിലുള്ള മറ്റ് ഐ.പി.എസ് ഉദ്യോഗസ്ഥർക്ക് ഈ വിധി വലിയൊരു പാഠമാകണമെന്നും കൂട്ടിച്ചേർത്തു.
കേസിൽ ടോമിൻ തച്ചങ്കരിക്ക് നാല് വർഷത്തെ കഠിനതടവിനു പുറമേ 30.84 ലക്ഷം രൂപ പിഴശിക്ഷയും കോട്ടയം വിജിലൻസ് കോടതി വിധിച്ചിട്ടുണ്ട്. പിഴയടയ്ക്കാൻ തയ്യാറായില്ലെങ്കിൽ രണ്ട് മാസം അധിക തടവ് കൂടി അനുഭവിക്കേണ്ടിവരും. 2003 മുതൽ 2007 വരെയുള്ള കാലയളവിൽ ഉദ്യോഗത്തിലിരിക്കെ തച്ചങ്കരി 64.7 ലക്ഷം രൂപ അനധികൃതമായി സമ്പാദിച്ചെന്ന കേസിന്റെ വിചാരണ പൂർത്തിയാക്കിയാണ് കോടതി ഈ സുപ്രധാന ശിക്ഷാവിധി പുറപ്പെടുവിച്ചിരിക്കുന്നത്.
