തമിഴ്നാട് നിയമസഭാ തിരഞ്ഞെടുപ്പിന്റെ ഭാഗമായുള്ള നാമനിർദ്ദേശ പത്രികകളുടെ സൂക്ഷ്മപരിശോധന ഇന്ന് നടക്കും. പത്രികാ സമർപ്പണത്തിനുള്ള സമയം ഇന്നലെ വൈകുന്നേരം മൂന്ന് മണിയോടെ അവസാനിച്ചപ്പോൾ സംസ്ഥാനത്തെ 234 മണ്ഡലങ്ങളിലുമായി ആകെ 4574 പത്രികകളാണ് ലഭിച്ചിരിക്കുന്നത്. എഐഎഡിഎംകെ ജനറൽ സെക്രട്ടറി എടപ്പാടി കെ. പളനിസാമി, മുൻ മുഖ്യമന്ത്രി ഒ. പനീർശെൽവം, ഡിഎംഡികെ അധ്യക്ഷ പ്രേമലത വിജയകാന്ത്, കേന്ദ്രമന്ത്രി എൽ. മുരുകൻ, മുൻ ഗവർണർ തമിഴിസൈ സൗന്ദർരാജൻ, ബിജെപി നേതാവ് നൈനാർ നാഗേന്ദ്രൻ തുടങ്ങിയ പ്രമുഖർ അവസാന ദിനമായ ഇന്നലെയാണ് പത്രിക സമർപ്പിച്ചത്. സമർപ്പിച്ച പത്രികകൾ പിൻവലിക്കാനുള്ള അവസാന തീയതി ഈ മാസം ഒൻപതാണ്.
അതേസമയം, കേരളത്തിനൊപ്പം വോട്ടെടുപ്പ് നടക്കുന്ന പുതുച്ചേരിയിൽ പരസ്യപ്രചാരണം ഇന്ന് അവസാനിക്കും. അവസാന വട്ട വോട്ട് ഉറപ്പിക്കാനായി കേന്ദ്രമന്ത്രി അമിത് ഷാ, തമിഴ്നാട് മുഖ്യമന്ത്രി എം.കെ. സ്റ്റാലിൻ, കോൺഗ്രസ് നേതാവ് രാഹുൽ ഗാന്ധി എന്നിവർ ഇന്നലെ പുതുച്ചേരിയിൽ സജീവമായിരുന്നു. തമിഴ്നാട് മുഖ്യമന്ത്രി സ്റ്റാലിൻ ഇന്ന് സീർകാഴിയിലും കടലൂരിലും പ്രചാരണ പരിപാടികളിൽ പങ്കെടുക്കും. അസം നിയമസഭാ തിരഞ്ഞെടുപ്പിന്റെ പരസ്യപ്രചാരണവും ഇന്ന് സമാപിക്കുകയാണ്. എൻഡിഎയ്ക്കായി അമിത് ഷായും പ്രതിപക്ഷത്തിനായി കോൺഗ്രസ് അധ്യക്ഷൻ മല്ലികാർജുൻ ഖാർഗെയും പ്രചാരണത്തിന് നേതൃത്വം നൽകുന്നുണ്ട്. അസം മുഖ്യമന്ത്രി ഹിമന്ത ബിശ്വ ശർമ്മയുടെ ഭാര്യക്കെതിരെയുള്ള ആരോപണങ്ങളെത്തുടർന്ന് കോൺഗ്രസ് വക്താവ് പവൻ ഖേരയ്ക്കെതിരെ അപകീർത്തി കേസ് ഫയൽ ചെയ്തത് അവിടെ രാഷ്ട്രീയ വാദപ്രതിവാദങ്ങൾക്ക് വഴിതെളിച്ചിട്ടുണ്ട്.
ബംഗാളിലാകട്ടെ, കോൺഗ്രസ് ഇന്ന് തങ്ങളുടെ പ്രകടനപത്രിക പുറത്തിറക്കും. ഇത്തവണ സഖ്യമില്ലാതെ സംസ്ഥാനത്തെ 294 സീറ്റുകളിലും ഒറ്റയ്ക്ക് മത്സരിക്കാനാണ് കോൺഗ്രസ് തീരുമാനം. എഐസിസി അധ്യക്ഷൻ മല്ലികാർജുൻ ഖാർഗെയാണ് പത്രിക പ്രകാശനം ചെയ്യുന്നത്. അയൽ സംസ്ഥാനങ്ങളിലെല്ലാം തിരഞ്ഞെടുപ്പ് ആവേശം കൊടുമുടിയിൽ എത്തുമ്പോൾ വരും ദിവസങ്ങളിലെ രാഷ്ട്രീയ നീക്കങ്ങൾ നിർണ്ണായകമാണ്.
