സ്മാർട്ട്ഫോൺ വിപണിയിൽ ഏറെ പ്രതീക്ഷയോടെ കാത്തിരിക്കുന്ന വൺപ്ലസിന്റെ അടുത്ത ഫ്ലാഗ്ഷിപ്പ് മോഡലായ വൺപ്ലസ് 16-നെ കുറിച്ചുള്ള നിർണ്ണായക വിവരങ്ങൾ പുറത്തുവന്നു. ഫോണിന്റെ ഔദ്യോഗിക പ്രഖ്യാപനം കമ്പനി ഇതുവരെ നടത്തിയിട്ടില്ലെങ്കിലും, പ്രമുഖ ചൈനീസ് ടിപ്സ്റ്ററായ ഡിജിറ്റൽ ചാറ്റ് സ്റ്റേഷൻ പുറത്തുവിട്ട ചോർച്ചാ വിവരങ്ങളാണ് ഇപ്പോൾ ടെക്ക് ലോകത്ത് വലിയ ചർച്ചയായിരിക്കുന്നത്. പുതിയ റിപ്പോർട്ടുകൾ പ്രകാരം അത്യാധുനിക ഡിസ്‌പ്ലേ സവിശേഷതകളുമായിട്ടായിരിക്കും വൺപ്ലസ് 16 വിപണിയിലെത്തുക. ഫോണിന്റെ എൻജിനീയറിംഗ് സാമ്പിളിൽ 185Hz റിഫ്രഷ് റേറ്റ് നൽകുന്ന ഡിസ്‌പ്ലേ നിലവിൽ പരീക്ഷണ ഘട്ടത്തിലാണെന്നാണ് സൂചന. നിലവിലെ ഭൂരിഭാഗം മുൻനിര ഫോണുകളും 120Hz മുതൽ 165Hz വരെ റിഫ്രഷ് റേറ്റ് നൽകുമ്പോൾ, വൺപ്ലസ് കൊണ്ടുവരുന്ന 185Hz റിഫ്രഷ് റേറ്റ് ഉപയോക്താക്കൾക്ക് കൂടുതൽ മിനുസമാർന്ന സ്ക്രോളിംഗും മികച്ച ഗെയിമിംഗ് അനുഭവവും സമ്മാനിക്കും. മുൻപ് ഈ മോഡലിൽ 240Hz ഡിസ്‌പ്ലേ ഉൾപ്പെടുത്തിയേക്കുമെന്ന് അഭ്യൂഹങ്ങൾ ഉണ്ടായിരുന്നെങ്കിലും, അത്രയും ഉയർന്ന നിരക്ക് പ്രായോഗികമല്ലാത്തതിനാൽ അന്തിമ മോഡലിൽ അത് 185Hz ആയി നിജപ്പെടുത്താനാണ് സാധ്യത.
പ്രശസ്ത ചൈനീസ് ഡിസ്‌പ്ലേ നിർമ്മാതാക്കളായ ബിഓഇ (BOE) വികസിപ്പിച്ച 6.78 ഇഞ്ച് വലിപ്പമുള്ള 1.5K റെസല്യൂഷൻ പാനലായിരിക്കും ഫോണിൽ ഉപയോഗിക്കുക. മുൻതലമുറ മോഡലുകളെ അപേക്ഷിച്ച് മികച്ച തെളിച്ചവും കളർ കൃത്യതയും കുറഞ്ഞ വൈദ്യുതി ഉപഭോഗവും ഇതിന്റെ പ്രത്യേകതകളായിരിക്കും. കൂടാതെ പ്രീമിയം ലുക്ക് നൽകാനായി സ്ക്രീനിന്റെ നാലു വശങ്ങളിലുമുള്ള ബെസലുകളുടെ കനം ഒരു മില്ലിമീറ്ററിൽ താഴെയായി ചുരുക്കിയിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു. പ്രോസസറിന്റെ കാര്യത്തിലേക്ക് വന്നാൽ ക്വാൽകോമിന്റെ ഇതുവരെ പ്രഖ്യാപിക്കപ്പെട്ടിട്ടില്ലാത്ത ഏറ്റവും പുതിയ സ്നാപ്ഡ്രൈഗൺ 8 എലൈറ്റ് ജെൻ 6 ചിപ്‌സെറ്റായിരിക്കും ഫോണിന് കരുത്തേകുക. ഇത് ഫോണിന് ഉയർന്ന വേഗതയും മെച്ചപ്പെട്ട എഐ കഴിവുകളും നൽകും. കഴിഞ്ഞ വർഷം ചൈനയിൽ അവതരിപ്പിച്ച വൺപ്ലസ് 15-ൽ 165Hz റിഫ്രഷ് റേറ്റുള്ള 6.78 ഇഞ്ച് QHD+ അമോലെഡ് ഡിസ്‌പ്ലേയും, 7,300mAh ബാറ്ററിയും 120W വയർഡ് ഫാസ്റ്റ് ചാർജിംഗും ഉണ്ടായിരുന്നു. വൺപ്ലസ് 16-നെ കുറിച്ചുള്ള ഈ വിവരങ്ങൾ ഇപ്പോൾ അഭ്യൂഹങ്ങൾ മാത്രമാണെങ്കിലും വരും മാസങ്ങളിൽ തന്നെ കമ്പനിയുടെ ഭാഗത്തുനിന്നും ഇതുസംബന്ധിച്ച ഔദ്യോഗിക പ്രഖ്യാപനങ്ങൾ ഉണ്ടാകുമെന്നാണ് കരുതുന്നത്. ഇതോടൊപ്പം വൺപ്ലസ് N6 മോഡലിന്റെ ഇന്ത്യൻ ലോഞ്ചും കമ്പനി ഉറപ്പാക്കിയിട്ടുണ്ട്, ഇതിന്റെ വില 18,000 രൂപ മുതൽ ആരംഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
