കർണാടകയിലെ ഉത്തര കന്നടയിലുണ്ടായ അതിഭീകരമായ റോഡപകടത്തിൽ ഏഴ് പേർ ദാരുണമായി മരണപ്പെട്ടു. ഉത്തര കന്നടയിലെ യെല്ലാപ്പൂർ താലൂക്കിലുള്ള അരബൈൽ ഘട്ടിൽ ദേശീയ പാത 52-ൽ പുലർച്ചെ 1.30-ഓടെയായിരുന്നു എംയുവി കാറും ട്രക്കും തമ്മിൽ കൂട്ടിയിടിച്ചത്. അപകടത്തിൽ രണ്ട് പേർക്ക് ഗുരുതരമായി പരിക്കേറ്റിട്ടുണ്ട്. ധാർവാഡ് സ്വദേശികളായ ഒമ്പത് പേരടങ്ങുന്ന സംഘമാണ് അപകടത്തിൽപ്പെട്ട വാഹനത്തിൽ ഉണ്ടായിരുന്നത്. ഇവർ ധാർവാഡിൽ നിന്നും ധർമസ്ഥലയിലേക്കും ചിക്മംഗ്ലൂരിലേക്കും യാത്ര പുറപ്പെട്ടതായിരുന്നുവെന്നാണ് ലഭിക്കുന്ന വിവരം. അക്ഷയ് (26), അഭിഷേക് ഈശ്വർ (28), അഭിഷേക് (27), ബസപ്പ (38), മഞ്ജുനാഥ് (33), സഞ്ജീവ് (33) എന്നിവരും, തുടർന്ന് ആശുപത്രിയിൽ ചികിത്സയിലിരിക്കെ മരണത്തിന് കീഴടങ്ങിയ മറ്റൊരാളുമാണ് അപകടത്തിൽ മരിച്ചത്.
സഞ്ജീവ് എന്നയാളായിരുന്നു കാറോടിച്ചിരുന്നത്. കാറിന്റെ അമിതവേഗതയും അലക്ഷ്യമായ ഡ്രൈവിംഗുമാണ് വലിയൊരു ദുരന്തത്തിന് കാരണമായതെന്നാണ് പോലീസ് പ്രാഥമികമായി വിലയിരുത്തുന്നത്. റോഡിന്റെ തെറ്റായ വശത്തുകൂടി (വലതുവശം) അമിതവേഗതയിലെത്തിയ കാർ, അങ്കോളയിൽ നിന്നും എതിർദിശയിൽ വരികയായിരുന്ന ട്രക്കിലേക്ക് നേരിട്ട് ഇടിച്ചുകയറുകയായിരുന്നു. ഇടിയുടെ ആഘാതത്തിൽ കാർ പൂർണ്ണമായും തകർന്നടിഞ്ഞു. തുടർന്ന് വാഹനം വെട്ടിപ്പൊളിച്ചാണ് അപകടത്തിൽപ്പെട്ടവരെ പുറത്തെടുക്കാൻ സാധിച്ചത്. അപകടവിവരമറിഞ്ഞ് സംഭവസ്ഥലത്തെത്തിയ പോലീസ് മൃതദേഹങ്ങൾ പോസ്റ്റുമോർട്ടം നടപടികൾക്കായി ആശുപത്രിയിലേക്ക് മാറ്റി. സംഭവത്തിൽ കേസെടുത്ത പോലീസ് കൂടുതൽ അന്വേഷണം ആരംഭിച്ചിട്ടുണ്ട്.
