കേരള പ്രദേശ് കോൺഗ്രസ് കമ്മിറ്റി (കെ.പി.സി.സി) അധ്യക്ഷ പദവിയുടെ കാര്യത്തിൽ അഖിലേന്ത്യാ കോൺഗ്രസ് കമ്മിറ്റി (എ.ഐ.സി.സി) ഇനിയും തീരുമാനമെടുത്തിട്ടില്ല. പുതിയ പ്രസിഡന്റിനായുള്ള ചർച്ചകൾ എപ്പോൾ ആരംഭിക്കുമെന്നതിൽ ഇപ്പോഴും വ്യക്തത കൈവന്നിട്ടില്ല. വരാനിരിക്കുന്ന നിയമസഭാ തിരഞ്ഞെടുപ്പുകൾ നടക്കുന്ന സംസ്ഥാനങ്ങളിലെ സംഘടനാ വിഷയങ്ങൾക്കാണ് എ.ഐ.സി.സി നിലവിൽ മുൻഗണന നൽകുന്നത്. അതേസമയം, കെ.സി. വേണുഗോപാൽ വിഷയത്തിൽ നേരിട്ട് ഇടപെടുകയോ അധ്യക്ഷ സ്ഥാനത്തേക്ക് ആരുടെയും പേര് നിർദേശിക്കുകയോ ചെയ്യില്ലെന്ന നിലപാടിലാണ്. നിലവിൽ സംസ്ഥാന വൈദ്യുതി മന്ത്രിയായ സണ്ണി ജോസഫാണ് തിരഞ്ഞെടുപ്പ് വിജയത്തിന് ശേഷവും കെ.പി.സി.സി അധ്യക്ഷനായി തുടരുന്നത്. എന്നാൽ പാർട്ടിക്ക് മുഴുവൻ സമയ അധ്യക്ഷൻ വേണമെന്ന ആവശ്യം നേതാക്കൾക്കിടയിൽ ശക്തമാണെങ്കിലും ഒറ്റപ്പേരിലേക്ക് എത്താൻ ഇതുവരെ സാധിച്ചിട്ടില്ല.
മന്ത്രിസ്ഥാനവും കെ.പി.സി.സി അധ്യക്ഷ പദവിയും ഒന്നിച്ചു കൊണ്ടുപോകാൻ സാധിക്കുമെങ്കിലും ‘ഒരാൾക്ക് ഒരു പദവി’ എന്ന നയത്തോടാണ് തനിക്ക് യോജിപ്പെന്ന് സണ്ണി ജോസഫ് പ്രതികരിച്ചിരുന്നു. ഏതെങ്കിലും ഒരു പദവി ഒഴിയാൻ ഹൈക്കമാൻഡ് നിർദേശിച്ചാൽ അതിന് തയ്യാറാണെന്നും അദ്ദേഹം വ്യക്തമാക്കി. പുതിയ പ്രസിഡന്റിന്റെ കാര്യത്തിൽ തീരുമാനം വൈകുന്ന സാഹചര്യത്തിൽ പാർട്ടി പ്രവർത്തനങ്ങളിൽ കൂടുതൽ സജീവമാകാനാണ് കെ.പി.സി.സി നേതൃത്വത്തിന്റെ തീരുമാനം. തിരുവനന്തപുരത്തുള്ള ദിവസങ്ങളിൽ സണ്ണി ജോസഫ് കൂടുതൽ സമയം ഇന്ദിരാഭവനിൽ ചെലവഴിച്ച് സംഘടനാ കാര്യങ്ങൾ ഏകോപിപ്പിക്കും.
