കോഹിനൂർ രത്നം ഇന്ത്യയ്ക്ക് തിരിച്ചുനൽകണമെന്ന ആവശ്യവുമായി ന്യൂയോർക്ക് മേയറും ഇന്ത്യൻ വംശജനുമായ സൊഹ്റാൻ മംദാനി രംഗത്തെത്തി. ബ്രിട്ടനിലെ ചാൾസ് രാജാവുമായുള്ള കൂടിക്കാഴ്ചയ്ക്ക് മുന്നോടിയായാണ് മംദാനി ഈ നിലപാട് വ്യക്തമാക്കിയത്. ഇന്നലെ വൈകിട്ട് നടന്ന 9/11 അനുസ്മരണ ചടങ്ങിൽ വെച്ച് ഇരുവരും കണ്ടുമുട്ടിയപ്പോൾ ഈ വിഷയം ചർച്ചയായുമോ എന്ന കാര്യത്തിൽ ഔദ്യോഗിക സ്ഥിരീകരണം ലഭ്യമല്ലെങ്കിലും, ആഗോളതലത്തിൽ ഈ ആവശ്യം വീണ്ടും ചർച്ചയായിരിക്കുകയാണ്. കൊളോണിയൽ ഭരണകാലത്തെ അതിക്രമങ്ങളുടെ പ്രതീകമായാണ് പലരും ബ്രിട്ടന്റെ കൈവശമുള്ള ഈ രത്നത്തെ കാണുന്നത്. ഇന്ത്യയുടെ ചരിത്രത്തിൽ ആഴത്തിൽ വേരുകളുള്ള ഈ അമൂല്യവസ്തു തിരികെ ലഭിക്കണമെന്ന ആവശ്യം നേരത്തെയും പലതവണ ഇന്ത്യൻ സർക്കാർ ബ്രിട്ടനോട് ഉന്നയിച്ചിട്ടുള്ളതാണ്.
പതിനാലാം നൂറ്റാണ്ടിൽ ആന്ധ്രാപ്രദേശിലെ കൊല്ലൂർ ഖനിയിൽ നിന്ന് കണ്ടെത്തിയ 105.6 കാരറ്റ് തൂക്കമുള്ള കോഹിനൂർ രത്നം, ഇന്ത്യയിലെ മുഗൾ ചക്രവർത്തിമാർ, ഇറാനിലെ ഷാമാർ, അഫ്ഗാനിസ്ഥാനിലെ അമീറുകൾ, സിഖ് മഹാരാജാക്കന്മാർ എന്നിവരുടെ കൈവശമായിരുന്നു വിവിധ കാലഘട്ടങ്ങളിലായി ഉണ്ടായിരുന്നത്. എന്നാൽ ഇന്ത്യയുടെ സ്വാതന്ത്ര്യത്തിന് മുമ്പ് ബ്രിട്ടീഷുകാർ ഇത് കൈക്കലാക്കി ലണ്ടനിലേക്ക് കടത്തുകയായിരുന്നു. എലിസബത്ത് രാജ്ഞിയുടെ കിരീടത്തിന്റെ ഭാഗമായ ഈ രത്നം നിലവിൽ ലണ്ടൻ ടവറിൽ പൊതുപ്രദർശനത്തിനായി സൂക്ഷിച്ചിരിക്കുകയാണ്. മംദാനിയുടെ ഈ നീക്കം കോഹിനൂർ തിരികെ കൊണ്ടുവരുന്നതിനായുള്ള അന്താരാഷ്ട്ര സമ്മർദ്ദങ്ങൾക്ക് പുതിയ കരുത്തുപകരുമെന്നാണ് വിലയിരുത്തപ്പെടുന്നത്.
