മണ്ണെണ്ണ വിഹിതം വർധിപ്പിക്കണം: കേന്ദ്രത്തിന് കത്തയച്ച് ഭക്ഷ്യ മന്ത്രി; വിതരണം പൂർണ്ണമായി തടസ്സപ്പെടുമെന്ന് മുന്നറിയിപ്പ്

സംസ്ഥാനത്തിനുള്ള ത്രൈമാസ മണ്ണെണ്ണ വിഹിതം 4,068 കിലോലിറ്ററിൽ നിന്ന് 9,564 കിലോലിറ്ററായി വർധിപ്പിക്കണമെന്ന് ആവശ്യപ്പെട്ട് ഭക്ഷ്യ-സിവിൽ സപ്ലൈസ് മന്ത്രി അനൂപ് ജേക്കബ് കേന്ദ്ര പെട്രോളിയം സഹമന്ത്രി സുരേഷ് ഗോപിക്ക് കത്തയച്ചു. സാമ്പത്തികമായി പിന്നാക്കം നിൽക്കുന്നവരും കുടിയേറ്റ തൊഴിലാളികളും തീരദേശ-മലയോര മേഖലകളിലുള്ളവരും പാചകത്തിനും വെളിച്ചത്തിനുമായി സബ്സിഡി മണ്ണെണ്ണയെയാണ് പ്രധാനമായും ആശ്രയിക്കുന്നത്. എൽ.പി.ജി വിതരണത്തിലെ നിയന്ത്രണങ്ങൾ മൂലം ഇന്ധന ആവശ്യകത വർധിച്ച സാഹചര്യത്തിൽ, വിതരണ അളവ് അര ലിറ്ററിൽ നിന്ന് ഒരു ലിറ്ററാക്കി ഉയർത്താൻ അധികവിഹിതം അത്യാവശ്യമാണെന്ന് കത്തിൽ ചൂണ്ടിക്കാണിക്കുന്നു. 2026-27 സാമ്പത്തിക വർഷത്തിലെ ആദ്യപാദത്തിൽ 5,496 കിലോലിറ്റർ അധികവിഹിതം അനുവദിക്കണമെന്ന് സിവിൽ സപ്ലൈസ് കമ്മീഷണറും നേരത്തെ കേന്ദ്രത്തോട് ആവശ്യപ്പെട്ടിരുന്നു.

കേന്ദ്ര സർക്കാർ വിഹിതം വെട്ടിക്കുറച്ചതോടെ കേരളം കടുത്ത മണ്ണെണ്ണ ക്ഷാമത്തിലേക്കാണ് നീങ്ങുന്നത്. മുൻപ് ലഭിച്ചിരുന്ന 56.76 ലക്ഷം ലിറ്ററിൽ നിന്ന് ഒക്ടോബർ-ഡിസംബർ പാദത്തിലും വിഹിതം 40.68 ലക്ഷം ലിറ്ററായി പരിമിതപ്പെടുത്തിയതോടെ 16.08 ലക്ഷം ലിറ്ററിന്റെ കുറവാണുണ്ടായത്. ഇത് കാരണം 95.5 ലക്ഷം വരുന്ന റേഷൻ കാർഡ് ഉടമകളിൽ മഞ്ഞ കാർഡുകാർക്ക് മൂന്ന് മാസത്തിലൊരിക്കൽ ഒരു ലിറ്ററും മറ്റ് കാർഡുകാർക്ക് അര ലിറ്ററും വീതം നൽകാൻ പോലും സാധിക്കാത്ത സ്ഥിതിയാണ്. കൂടാതെ, റേഷൻ മണ്ണെണ്ണയുടെ വില ലിറ്ററിന് 71 മുതൽ 76 രൂപ വരെയായി കേന്ദ്രം വർധിപ്പിച്ചതും, മത്സ്യബന്ധന വള്ളങ്ങൾക്ക് ആവശ്യമായ മണ്ണെണ്ണ റേഷൻ വിഹിതത്തിൽ നിന്ന് കണ്ടെത്തേണ്ടി വരുന്നതും പ്രതിസന്ധി ഇരട്ടിയാക്കുന്നു.