തിരുവനന്തപുരം: നീണ്ട 35 വർഷത്തെ അവിസ്മരണീയമായ ഔദ്യോഗിക സർവീസിന് ശേഷം സംസ്ഥാന ചീഫ് സെക്രട്ടറി ഡോ. എ. ജയതിലക് ഇന്ന് പദവിയിൽ നിന്നും വിരമിക്കുന്നു. വിരമിക്കുന്ന ചീഫ് സെക്രട്ടറിക്ക് സംസ്ഥാന സർക്കാർ ഇന്ന് ഔദ്യോഗികമായി യാത്രയയപ്പ് നൽകും. ഉച്ചയ്ക്ക് മൂന്ന് മണിക്ക് സെക്രട്ടേറിയറ്റിലെ ദർബാർ ഹാളിൽ സംഘടിപ്പിക്കുന്ന പ്രൗഢഗംഭീരമായ യാത്രയയപ്പ് ചടങ്ങിൽ മുഖ്യമന്ത്രി വി.ഡി. സതീശൻ പങ്കെടുത്ത് ആശംസകൾ നേരും. ഡോ. എ. ജയതിലക് വിരമിക്കുന്ന ഒഴിവിൽ സംസ്ഥാനത്തിന്റെ പുതിയ ചീഫ് സെക്രട്ടറിയായി നിലവിലെ ആഭ്യന്തര സെക്രട്ടറി ബിശ്വനാഥ് സിൻഹ വൈകുന്നേരത്തോടെ ചുമതലയേൽക്കും. ബിശ്വനാഥ് സിൻഹ ചീഫ് സെക്രട്ടറി പദവിയിലേക്ക് ഉയരുന്നതോടെ സംസ്ഥാനത്തെ ഐ.എ.എസ് തലപ്പത്ത് വിപുലമായ അഴിച്ചുപണിക്ക് വഴിതുറക്കും.
ചീഫ് സെക്രട്ടറിയുടെ വിരമിക്കൽ പ്രമാണിച്ച് സാധാരണയായി ബുധനാഴ്ചകളിൽ ചേരാറുള്ള സംസ്ഥാന മന്ത്രിസഭാ യോഗം പ്രത്യേക സാഹചര്യ കണക്കിലെടുത്ത് ഇന്നേക്ക് മാറ്റിവെച്ചിട്ടുണ്ട്. ഇന്ന് കൂടുന്ന മന്ത്രിസഭാ യോഗം വിരമിക്കുന്ന ചീഫ് സെക്രട്ടറിക്ക് ഔദ്യോഗികമായി ആശംസകൾ നേരുകയും, ബിശ്വനാഥ് സിൻഹ പടിയിറങ്ങുന്ന ആഭ്യന്തര സെക്രട്ടറി പദവി ഉൾപ്പെടെയുള്ള തന്ത്രപ്രധാന തസ്തികകളിലേക്കുള്ള പുതിയ നിയമനങ്ങൾ പരിഗണിക്കുകയും ചെയ്യും. അതേസമയം, ദേശീയതലത്തിൽ വൻ വിവാദമായ നീറ്റ് പരീക്ഷയിലെ ക്രമക്കേടുകൾക്കെതിരെയുള്ള പ്രത്യേക പ്രമേയം ഇന്ന് നിയമസഭ പാസാക്കും. പരീക്ഷാ ക്രമക്കേടുകളുടെ പശ്ചാത്തലത്തിൽ നിലവിലെ ദേശീയ പരീക്ഷാ സംവിധാനം സമഗ്രമായി പരിഷ്കരിക്കണമെന്ന് ആവശ്യപ്പെടുന്ന പ്രമേയം ഉന്നത വിദ്യാഭ്യാസ മന്ത്രി റോജി എം. ജോൺ ആണ് സഭയിൽ അവതരിപ്പിക്കുക. വിവിധ സർക്കാർ വകുപ്പുകളുടെ ധനാഭ്യർത്ഥനകളെ സംബന്ധിച്ചുള്ള വിശദമായ ചർച്ചകളാണ് ഇന്ന് നിയമസഭയിലെ മറ്റ് പ്രധാന അജണ്ടകൾ.
