സ്മാർട്ട്ഫോൺ ക്യാമറ സാങ്കേതികവിദ്യയിൽ വിപ്ലവകരമായ മാറ്റങ്ങളുമായി ഹോണറിന്റെ ‘റോബോട്ട് ഫോൺ’ ചൈനീസ് വിപണിയിൽ അവതരിപ്പിച്ചു. ഫോണിന്റെ മുകൾഭാഗത്ത് നിന്ന് പുറത്തേക്ക് വരുന്ന റോബോട്ടിക് ജിംബൽ ക്യാമറ സംവിധാനമാണ് ഇതിന്റെ പ്രധാന ആകർഷണം. ട്രൈപോഡിന്റെ സഹായമില്ലാതെ കൈകളുടെ ഉപയോഗമില്ലാതെ വീഡിയോ ചിത്രീകരിക്കാൻ സഹായിക്കുന്നതാണ് ഈ 200 മെഗാപിക്സൽ ക്യാമറ. എഐ അധിഷ്ഠിത സബ്ജക്ട് ട്രാക്കിങ് സംവിധാനമുള്ളതിനാൽ വീഡിയോ ചിത്രീകരണവേളയിൽ വ്യക്തികളെ കൃത്യമായി ഫ്രെയിമിൽ നിലനിർത്താൻ സാധിക്കും. റോബോട്ടിക് ക്യാമറ സാങ്കേതികവിദ്യയ്ക്കായി അരിയുമായി സഹകരിച്ച് വികസിപ്പിച്ച ഈ ഫോണിൽ സ്നാപ്ഡ്രാഗൺ 8 എലൈറ്റ് ജെൻ 5 ഒക്ടാകോർ പ്രോസസറും അഡ്രിനോ 840 ജിപിയുവുമാണ് ഉൾപ്പെടുത്തിയിരിക്കുന്നത്.
മാജിക് ഒഎസ് 10 അടിസ്ഥാനമാക്കി പ്രവർത്തിക്കുന്ന ഈ ഡ്യുവൽ സിം ഫോണിൽ 6.31 ഇഞ്ച് ഓഎൽഇഡി ഡിസ്പ്ലേയാണുള്ളത്. 1,216 × 2,640 പിക്സൽ റെസല്യൂഷനും, 120 ഹെർട്സ് അഡാപ്റ്റീവ് റിഫ്രഷ് റേറ്റും, പരമാവധി 6,800 നിറ്റ്സ് എച്ച്ഡിആർ പ്രകാശതീവ്രതയും ഇതിനുണ്ട്. 1/1.28 ഇഞ്ച് സിഎംഒഎസ് സെൻസറുള്ള 200 മെഗാപിക്സൽ പ്രധാന ക്യാമറയ്ക്ക് പുറമേ 200 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയും (2.7x ഒപ്റ്റിക്കൽ സൂം, 200x ഡിജിറ്റൽ സൂം) 50 മെഗാപിക്സൽ അൾട്രാ വൈഡ് ക്യാമറയും ഉൾപ്പെടുന്ന ട്രിപ്പിൾ ക്യാമറ സെറ്റപ്പാണ് പിന്നിലുള്ളത്. മുൻവശത്ത് 50 മെഗാപിക്സൽ സെൽഫി ക്യാമറയുമുണ്ട്. മൂന്ന് ആക്സിസുകളിലുള്ള മെക്കാനിക്കൽ ജിംബൽ സ്റ്റബിലൈസേഷനുള്ള റോബോട്ടിക് ക്യാമറ ഉപയോഗിച്ച് 120 എഫ്പിഎസിൽ 4കെ വീഡിയോ റെക്കോർഡ് ചെയ്യാം. കൂടാതെ 14,000 എംഎഎച്ച് ബാറ്ററിയുള്ള പുതിയ ഫോണും എഐ കരുത്തിൽ ഹോണർ എക്സ്7ഇ പ്ലസ് 5ജി വികസിപ്പിക്കുന്നതായും സൂചനകളുണ്ട്.
7,060 എംഎഎച്ച് ബാറ്ററിയുള്ള ഈ മോഡലിൽ 120 വാട്ട് വയേർഡ് ഫാസ്റ്റ് ചാർജിങ്, 50 വാട്ട് വയർലെസ് ചാർജിങ്, വയർലെസ് റിവേഴ്സ് ചാർജിങ് സംവിധാനങ്ങളുണ്ട്. 248 ഗ്രാം ഭാരമുള്ള ഫോണിൽ 5ജി, വൈഫൈ 7, ബ്ലൂടൂത്ത് 6.0, എൻഎഫ്സി, സ്റ്റീരിയോ സ്പീക്കറുകൾ, 3ഡി അൾട്രാസോണിക് ഫിംഗർപ്രിന്റ് സെൻസർ തുടങ്ങി നിരവധി കണക്റ്റിവിറ്റി-സുരക്ഷാ സംവിധാനങ്ങളുമുണ്ട്. 12 ജിബി റാം + 512 ജിബി സ്റ്റോറേജ് മോഡലിന് ചൈനയിൽ 9,999 ചൈനീസ് യുവാനും (ഏകദേശം ₹1,41,000), 16 ജിബി റാം + 1 ടിബി സ്റ്റോറേജ് മോഡലിന് 12,999 ചൈനീസ് യുവാനുമാണ് (ഏകദേശം ₹1,83,000) വില. മൂൺ ഷാഡോ ഗ്രേ, സ്റ്റാർ ട്രെയിൽ സിൽവർ നിറങ്ങളിൽ ലഭ്യമാകുന്ന ഈ ഫോൺ മൊബൈൽ വേൾഡ് കോൺഗ്രസ് 2026-ലും പ്രദർശിപ്പിച്ചിരുന്നു.
