ശബരിമലയിലെ സ്വർണ്ണം പൊതിഞ്ഞ ശ്രീകോവിലിന്റെ മുകൾഭാഗത്ത് അസാധാരണമായ രീതിയിൽ നിറവ്യത്യാസം കണ്ടെത്തിയത് വൻ ചർച്ചയാകുന്നു. ശ്രീകോവിലിന് മുകളിൽ എന്തോ ദ്രാവകം ഒഴിച്ചതാണോ എന്ന കടുത്ത സംശയം ഉയർന്ന സാഹചര്യത്തിൽ, വിഷയത്തിന്റെ ഗൗരവം കണക്കിലെടുത്ത് തിരുവാഭരണ കമ്മീഷണർ അടക്കമുള്ള ഉന്നത ഉദ്യോഗസ്ഥർ ശബരിമലയിൽ നേരിട്ടെത്തി വിശദമായ പരിശോധനകൾ നടത്തി. പ്രാഥമിക പരിശോധനകൾക്ക് ശേഷം, ഭക്തർ സമർപ്പിക്കുന്ന നെയ്യ് മുകളിൽ നിന്നും ഒഴുകിയിറങ്ങിയതാകാം ഈ നിറവ്യത്യാസത്തിന് കാരണമായതെന്നാണ് ഉദ്യോഗസ്ഥ സംഘത്തിന്റെ വിലയിരുത്തൽ. എങ്കിലും സ്വർണ്ണപാളികൾക്ക് മുകളിൽ ദ്രാവകം വീണതുമായി ബന്ധപ്പെട്ട കാര്യങ്ങളിൽ കൂടുതൽ വ്യക്തത വരുത്താൻ അധികൃതർ തുടർനടപടികൾ സ്വീകരിച്ചു വരികയാണ്. ശബരിമല തീർത്ഥാടനവുമായി ബന്ധപ്പെട്ട് ഏറെ പ്രാധാന്യമുള്ള സ്വർണ്ണ ശ്രീകോവിലിൽ ഇത്തരമൊരു വ്യത്യാസം കണ്ടത് അധികൃതർ അതീവ ശ്രദ്ധയോടെയാണ് വീക്ഷിക്കുന്നത്. ശബരിമല സ്വർണക്കൊള്ളയുമായി ബന്ധപ്പെട്ട് പ്രത്യേക അന്വേഷണ സംഘം (എസ്ഐടി) ഹൈക്കോടതിയുടെ പ്രത്യേക അനുമതിയോടെ സന്നിധാനത്ത് പ്രഭാമണ്ഡലം അടക്കം ഇളക്കി പരിശോധന നടത്തിയതിന് തൊട്ടുപിന്നാലെയാണ് ഈ നിറവ്യത്യാസം കണ്ടെത്തിയെന്ന വാർത്തയും പുറത്തുവരുന്നത്.
അതേസമയം, ശബരിമലയിലെ സ്വർണ്ണപ്പാളി കൈമാറ്റക്കേസുമായി ബന്ധപ്പെട്ട് ദേവസ്വം ബോർഡ് മുൻ പ്രസിഡണ്ട് പി.എസ്. പ്രശാന്തിനും മുൻ ബോർഡ് അംഗമായിരുന്ന അജികുമാറിനും എസ്ഐടി നോട്ടീസ് അയച്ചു. ഹൈക്കോടതിയുടെ മുൻകൂട്ടിയുള്ള അനുമതിയില്ലാതെ സ്വർണപാളികൾ ‘സ്മാർട് ക്രിയേഷൻസ്’ എന്ന സ്ഥാപനത്തിലേക്ക് കൊണ്ടുപോയ സംഭവത്തിൽ അടുത്തയാഴ്ച ചോദ്യം ചെയ്യലിന് ഹാജരാകാനാണ് ഇരുവർക്കും നിർദ്ദേശം നൽകിയിരിക്കുന്നത്. 2025-ലെ ഇടപാടുകളും കൃത്യമായി അന്വേഷിക്കണമെന്ന ഹൈക്കോടതി ഉത്തരവിന്റെ അടിസ്ഥാനത്തിലാണ് അന്വേഷണ സംഘത്തിന്റെ ഈ ശക്തമായ നീക്കം. ഇതിന്റെ ഭാഗമായി കൂടുതൽ സാമ്പിളുകൾ ശേഖരിക്കുന്നതിനായി എസ്ഐടി സംഘം ഇന്ന് വീണ്ടും ശബരിമലയിൽ എത്തിച്ചേർന്നിട്ടുണ്ട്. കേസിൽ നിർണായകമായ ശാസ്ത്രീയ പരിശോധനകൾക്കായി പ്രഭാമണ്ഡലത്തിൽ നിന്നടക്കമുള്ള സ്വർണ്ണ സാമ്പിളുകൾ ശേഖരിച്ച് ലാബിലേക്ക് അയക്കാനാണ് നിലവിൽ അന്വേഷണ സംഘം തീരുമാനിച്ചിരിക്കുന്നത്.
