കൊച്ചി: എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന് രാജ്യം നൽകിയ പത്മഭൂഷൺ പുരസ്കാരത്തിൽ ഇടപെടാൻ സാധിക്കില്ലെന്ന് ഹൈക്കോടതി. അദ്ദേഹത്തിന് ലഭിച്ച പത്മഭൂഷൺ ബഹുമതി റദ്ദാക്കണമെന്നാവശ്യപ്പെട്ട് സമർപ്പിക്കപ്പെട്ട പൊതുതാൽപര്യ ഹർജി തള്ളിക്കൊണ്ടാണ് ഹൈക്കോടതി ഡിവിഷൻ ബെഞ്ച് ഇക്കാര്യം വ്യക്തമാക്കിയത്. കോടതികളിൽ ചില കേസുകൾ നിലവിലുണ്ടെന്ന കാരണത്താൽ മാത്രം ഒരാളെ കുറ്റക്കാരനായി മുൻകൂട്ടി കണക്കാക്കാനാകില്ലെന്ന് കോടതി ഉത്തരവിൽ നിരീക്ഷിച്ചു. വെള്ളാപ്പള്ളി നടേശനെതിരെയുള്ള കേസുകളിൽ ഇതുവരെയും വിചാരണ പൂർത്തിയാകുകയോ കോടതികൾ ശിക്ഷ വിധിക്കുകയോ ചെയ്തിട്ടില്ലെന്നും, ഇതിൽ ചില കേസുകളിലെ തുടർനടപടികൾ സുപ്രീംകോടതി നിലവിൽ സ്റ്റേ ചെയ്തിരിക്കുകയാണെന്നും ഡിവിഷൻ ബെഞ്ച് ചൂണ്ടിക്കാട്ടി.
പുരസ്കാരം റദ്ദാക്കണമെന്ന ഹർജിക്കാരുടെ ആവശ്യത്തിന്മേൽ വ്യക്തമായ നിയമവശവും ഹൈക്കോടതി ഓർമ്മിപ്പിച്ചു. ഭാവിയിൽ ഏതെങ്കിലും തരത്തിൽ ഒരു വ്യക്തി നിയമപരമായി കുറ്റക്കാരനാണെന്ന് തെളിയുകയോ, അല്ലെങ്കിൽ അതിന് അനുയോജ്യമായ പ്രത്യേക സാഹചര്യങ്ങൾ രൂപപ്പെടുകയോ ചെയ്താൽ ബഹുമതികൾ റദ്ദാക്കാനുള്ള പൂർണ്ണ അധികാരം രാജ്യത്തിന്റെ രാഷ്ട്രപതിക്കുണ്ടെന്നും കോടതി വ്യക്തമാക്കി. ഈ സാഹചര്യങ്ങൾ മുൻനിർത്തിയാണ് വെള്ളാപ്പള്ളി നടേശന്റെ പത്മഭൂഷൺ പുരസ്കാരവുമായി ബന്ധപ്പെട്ട ഹർജിയിൽ ഇടപെടാൻ കോടതി വിസമ്മതിച്ചത്.
