കൊച്ചിയിൽ നടിയെ ആക്രമിച്ച കേസിൽ തുടരന്വേഷണം ആവശ്യപ്പെട്ട് അതിജീവിത സമർപ്പിച്ച ഹർജി പരിഗണിക്കുന്നതിൽ നിന്നും ഹൈക്കോടതി ജഡ്ജി പിന്മാറി. ജസ്റ്റിസ് ജോബിൻ സെബാസ്റ്റ്യൻ കേസ് കേൾക്കുന്നതിൽ നിന്നും പിന്മാറിയതോടെ അതിജീവിതയുടെ ഈ അപേക്ഷ ഇനി കോടതിയുടെ മറ്റൊരു ബെഞ്ചാകും പരിഗണിക്കുക. കേസിന്റെ നിർണായക തെളിവായ മെമ്മറി കാർഡിന്റെ ഹാഷ് വാല്യൂ മാറിയ സംഭവത്തിൽ വിശദമായതും കൃത്യവുമായ അന്വേഷണം വേണമെന്നാണ് അതിജീവിത കോടതിയിൽ പ്രധാനമായും ആവശ്യപ്പെട്ടിരിക്കുന്നത്. ഹർജി പരിഗണനയ്ക്ക് വന്ന വേളയിൽ, മുൻപും സമാനമായ രീതിയിലുള്ള അന്വേഷണം ആവശ്യപ്പെട്ടിരുന്നോ എന്ന് കോടതി ചോദിച്ചറിഞ്ഞു. അതിജീവിതയുടെ ഈ ഹർജിയിൽ ഉന്നയിച്ചിട്ടുള്ള കാര്യങ്ങൾ പിന്നീട് വിശദമായിത്തന്നെ കേൾക്കാമെന്നും കോടതി വ്യക്തമാക്കിയിട്ടുണ്ട്.
