ആഫ്രിക്കൻ രാജ്യങ്ങളായ ഡെമോക്രാറ്റിക് റിപ്പബ്ലിക് ഓഫ് കോംഗോ (ഡിആർ കോംഗോ), ഉഗാണ്ട എന്നിവിടങ്ങളിൽ എബോള വൈറസ് വ്യാപനം അതിവേഗത്തിലാണെന്ന് വ്യക്തമാക്കി ലോകാരോഗ്യ സംഘടന രംഗത്ത്. ഇരു രാജ്യങ്ങളിലുമായി ഇതുവരെ 220 പേർ രോഗബാധയെ തുടർന്ന് മരണപ്പെട്ടതായാണ് ഔദ്യോഗിക കണക്കുകൾ സൂചിപ്പിക്കുന്നത്. പ്രാരംഭ ഘട്ടത്തിൽ എബോള കേസുകൾ കൃത്യമായി കണ്ടെത്തുന്നതിൽ സംഭവിച്ച കാലതാമസമാണ് നിലവിലെ അതിരൂക്ഷമായ വൈറസ് വ്യാപനത്തിന് പ്രധാന കാരണമായത്. ഡിആർ കോംഗോയുമായി അതിർത്തി പങ്കിടുന്ന മറ്റ് അയൽരാജ്യങ്ങളിലും നിലവിൽ എബോള പടരാനുള്ള ഉയർന്ന അപകടസാധ്യതയുണ്ടെന്ന് ലോകാരോഗ്യ സംഘടന കർശന മുന്നറിയിപ്പ് നൽകിയിട്ടുണ്ട്. ഇതിനിടയിൽ, ഡിആർ കോംഗോയിൽ എബോള രോഗികളെ പരിചരിക്കുന്ന ആശുപത്രികൾക്ക് നേരെ ഒരു വിഭാഗം ആളുകളുടെ ഭാഗത്തുനിന്ന് ആക്രമണങ്ങൾ ഉണ്ടായത് സ്ഥിതിഗതികൾ കൂടുതൽ സങ്കീർണ്ണമാക്കി. കൂടാതെ, മരിച്ചവരുടെ മൃതദേഹങ്ങൾ കൃത്യമായ ആരോഗ്യ മാനദണ്ഡങ്ങൾ പാലിക്കാതെ ബന്ധുക്കൾ കൊണ്ടുപോകുന്നതും, സുരക്ഷിതമല്ലാത്ത ശ്മശാനങ്ങളും പരമ്പരാഗത ശവസംസ്കാര രീതികളും രോഗവ്യാപനം വൻതോതിൽ വർധിക്കാൻ ഇടയാക്കുന്നുണ്ടെന്നും ലോകാരോഗ്യ സംഘടന ചൂണ്ടിക്കാണിക്കുന്നു.
അതിവേഗം പടരുന്ന എബോള വൈറസ് വ്യാപനത്തിന്റെ പശ്ചാത്തലത്തിൽ വിമാന സർവീസുകൾക്കായി രാജ്യത്ത് ഡിജിസിഎ കർശനമായ സുരക്ഷാ മാനദണ്ഡങ്ങൾ പുറപ്പെടുവിച്ചിട്ടുണ്ട്. ഉഗാണ്ട, റിപ്പബ്ലിക് ഓഫ് കോംഗോ എന്നീ രാജ്യങ്ങളിലൂടെ സർവീസ് നടത്തുന്ന വിമാനക്കമ്പനികൾക്കാണ് ഈ നിർദേശം ബാധകമാക്കിയിരിക്കുന്നത്. ഇതനുസരിച്ച് വിമാനക്കമ്പനികൾ യാത്രയ്ക്കിടയിൽ പ്രത്യേക ഓൺ ബോർഡ് നിരീക്ഷണം നടത്തുകയും, യാത്രക്കാരിൽ നിന്ന് കൃത്യമായ വിവരങ്ങൾ അടങ്ങിയ സെൽഫ് ഡിക്ലറേഷൻ ഫോം നിർബന്ധമായി ശേഖരിക്കുകയും വേണം. ഇതിനുപുറമെ യാത്രയ്ക്കിടയിൽ രോഗലക്ഷണങ്ങളെയും മുൻകരുതലുകളെയും കുറിച്ചുള്ള പ്രത്യേക അനൗൺസ്‌മെന്റുകൾ വിമാനത്തിൽ നൽകേണ്ടതുണ്ട്. ഈ മാസം 22-നാണ് ഡിജിസിഎ ഈ മാർഗ്ഗനിർദ്ദേശങ്ങൾ വിമാനക്കമ്പനികൾക്ക് കൈമാറിയത്. ആഫ്രിക്കൻ രാജ്യങ്ങളിൽ നിന്നും യാത്ര ചെയ്ത് ഇന്ത്യയിൽ എത്തിയാൽ, അടുത്ത 21 ദിവസത്തിനുള്ളിൽ എബോളയുടെ എന്തെങ്കിലും തരത്തിലുള്ള രോഗലക്ഷണങ്ങൾ പ്രകടമായാൽ ഉടൻ തന്നെ വിദഗ്ധ ചികിത്സ തേടണമെന്ന് കേന്ദ്ര ആരോഗ്യ മന്ത്രാലയവും പൊതുജനങ്ങൾക്ക് പ്രത്യേക നിർദേശം നൽകിയിട്ടുണ്ട്.
