ബിഹാറിലെ ഭരണകക്ഷിയായ ബി.ജെ.പിക്ക് വൻ തിരിച്ചടി നൽകി ബങ്കിപൂർ നിയമസഭാ ഉപതിരഞ്ഞെടുപ്പിൽ രാഷ്ട്രീയ തന്ത്രജ്ഞൻ പ്രശാന്ത് കിഷോറിന് ഉജ്ജ്വല വിജയം. പതിറ്റാണ്ടുകളായി ബി.ജെ.പിയുടെ ഉറച്ച കോട്ടയായിരുന്ന ബങ്കിപൂരിൽ, തന്റെ കന്നി പോരാട്ടത്തിനിറങ്ങിയ പ്രശാന്ത് കിഷോർ ബി.ജെ.പിയുടെ നീരജ് കുമാർ സിംഗിനെയാണ് തറപറ്റിച്ചത്. ബി.ജെ.പി അധ്യക്ഷൻ നിതിൻ നബീൻ രാജ്യസഭയിലേക്ക് തിരഞ്ഞെടുക്കപ്പെട്ടതിനെ തുടർന്ന് ഒഴിവുവന്ന സീറ്റിലാണ് ഇവിടെ ഉപതിരഞ്ഞെടുപ്പ് നടന്നത്. നഗരമേഖലകളിലെ വോട്ടർമാരും യുവാക്കളും ഭരണകക്ഷിക്ക് എതിരായതും പരമ്പരാഗത വോട്ട് ബാങ്കുകളിലുണ്ടായ ചോർച്ചയുമാണ് മണ്ഡലത്തിൽ ജൻ സുരാജ് പാർട്ടിക്ക് തുണയായതെന്നാണ് വിലയിരുത്തപ്പെടുന്നത്.
അതേസമയം മറ്റ് സംസ്ഥാനങ്ങളിലെ ഉപതിരഞ്ഞെടുപ്പ് ഫലങ്ങളിൽ, ഗുജറാത്തിലെ മഞ്ചൽപൂർ നിയമസഭാ സീറ്റ് ബി.ജെ.പിയും മധ്യപ്രദേശിലെ ദാതിയ സീറ്റ് കോൺഗ്രസും നിലനിർത്തി. മഞ്ചൽപൂരിൽ ബി.ജെ.പിയുടെ സതീഷ് പട്ടേൽ കോൺഗ്രസ് സ്ഥാനാർത്ഥി ഭിഖാഭായ് റബാരിയെ 30,000-ത്തിൽ പരം വോട്ടുകളുടെ ഭൂരിപക്ഷത്തിലാണ് പരാജയപ്പെടുത്തിയത്.
