കൊച്ചി: പശ്ചിമബംഗാളിൽ പെൺസുഹൃത്തിനെ ക്രൂരമായി കൊലപ്പെടുത്തിയ ശേഷം കേരളത്തിലേക്ക് കടന്ന് ഒളിവിൽ കഴിഞ്ഞിരുന്ന പ്രതിയെ ഒടുവിൽ പെരുമ്പാവൂർ പോലീസ് പിടികൂടി. പശ്ചിമബംഗാളിലെ കൃഷ്ണഗുഞ്ച് സ്വദേശിയായ അമ്പത്തിയൊന്നുകാരൻ ഫക്കീർ മണ്ഡൽ ആണ് പോലീസിന്റെ വലയിലായത്. കൊലപാതകത്തിന് ശേഷം കൃത്യമായി ഒളിത്താവളങ്ങൾ മാറ്റി നടന്ന ഇയാൾ ഏതാണ്ട് ഒരാഴ്ച മുൻപാണ് പെരുമ്പാവൂരിലെത്തിയത്. തുടർന്ന് മുടിക്കലിലുള്ള ഒരു വാടകവീട്ടിൽ ആൾമാറാട്ടത്തിൽ താമസിച്ച് വരികയായിരുന്നു. പശ്ചിമബംഗാൾ പോലീസ് ഇയാൾക്കായി രാജ്യവ്യാപകമായി അന്വേഷണം ഊർജ്ജിതമാക്കിയതിനിടയിലാണ് പെരുമ്പാവൂർ പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ മിന്നൽ പരിശോധന നടത്തി പ്രതിയെ കസ്റ്റഡിയിലെടുത്തത്.
അറസ്റ്റിലായ ഫക്കീർ മണ്ഡലിനെ പ്രാഥമിക ചോദ്യം ചെയ്യലുകൾക്കും നിയമനടപടികൾക്കും ശേഷം കേരള പോലീസ് പശ്ചിമബംഗാൾ പോലീസിന് കൈമാറിയിട്ടുണ്ട്. അന്തർസംസ്ഥാന കുറ്റവാളികൾക്കും മറ്റ് പലവിധ ക്രിമിനൽ കേസുകളിൽ പെടുന്നവർക്കും ഒളിവിൽ കഴിയാനുള്ള പ്രധാന കേന്ദ്രമായി പെരുമ്പാവൂരും പരിസര പ്രദേശങ്ങളും മാറുന്നു എന്ന കണ്ടെത്തലിനെത്തുടർന്ന് പോലീസ് ഇവിടെ നിരീക്ഷണം ശക്തമാക്കിയിരുന്നു. ഇതിനോടകം തന്നെ ഇത്തരത്തിൽ മറ്റ് സംസ്ഥാനങ്ങളിൽ കുറ്റകൃത്യങ്ങൾ ചെയ്ത് പെരുമ്പാവൂരിന്റെ വിവിധ ഭാഗങ്ങളിൽ ഒളിവിൽ കഴിഞ്ഞിരുന്ന നിരവധി പ്രതികളെയാണ് പോലീസ് കൃത്യമായ പരിശോധനകളിലൂടെ വലയിലാക്കിയിട്ടുള്ളത്.
