വൈദ്യുതി വകുപ്പ് മന്ത്രി സണ്ണി ജോസഫുമായി നടത്തിയ ചർച്ച വിജയകരമായതിനെ തുടർന്ന് കെ.എസ്.ഇ.ബിയിലെ മീറ്റർ റീഡർമാർ നടത്തിവന്ന സമരം പിൻവലിച്ചു. തൊഴിലാളികൾ ഉന്നയിച്ച വിഷയങ്ങൾ സഹാനുഭൂതിയോടെ പരിഗണിക്കുമെന്ന് മന്ത്രി ഉറപ്പുനൽകിയതിനെ തുടർന്നാണ് സമരം അവസാനിപ്പിക്കാൻ വിവിധ യൂണിയനുകൾ തീരുമാനിച്ചത്. സമരം ചെയ്തതിന്റെ പേരിൽ ജോലിയിൽ നിന്ന് പുറത്താക്കിയ മീറ്റർ റീഡർമാരെ തിരിച്ചെടുക്കാനും, മീറ്റർ റീഡർമാരുടെ പ്രശ്നങ്ങൾ പഠിച്ച് റിപ്പോർട്ട് സമർപ്പിക്കാൻ പ്രത്യേക സമിതിയെ നിയോഗിക്കാനും ഇന്ന് നടന്ന ചർച്ചയിൽ ധാരണയായി. ഒരു മാസത്തിനകം ഈ സമിതി റിപ്പോർട്ട് നൽകണമെന്നാണ് നിർദ്ദേശം.
വേതനവർധനവ് ഉൾപ്പെടെയുള്ള വിവിധ ആവശ്യങ്ങൾ ഉന്നയിച്ച് കഴിഞ്ഞ ഒക്ടോബർ ഒന്ന് മുതലാണ് മീറ്റർ റീഡർമാരുടെ സമരം ആരംഭിച്ചത്. ഉപഭോക്താക്കളുടെ മീറ്റർ റീഡിങ്ങിനൊപ്പം മാക്സിമം ഡിമാൻഡ് (ആർ.എം.ഡി) കൂടി രേഖപ്പെടുത്താനുള്ള കെ.എസ്.ഇ.ബി നിർദ്ദേശമാണ് പ്രധാന തർക്കവിഷയമായത്. ആർ.എം.ഡി രേഖപ്പെടുത്താൻ ഓരോ വീട്ടിലും ഏകദേശം 20 മിനിറ്റോളം സമയം വേണ്ടി വരുമെന്നും, നിലവിൽ പല മീറ്ററുകളിലും ഇതിനുള്ള സൗകര്യമില്ലെന്നും ചൂണ്ടിക്കാട്ടിയ തൊഴിലാളികൾ, അധിക ജോലിഭാരത്തിന് ആനുപാതികമായി വേതനം വർദ്ധിപ്പിക്കണമെന്ന് ആവശ്യപ്പെടുകയായിരുന്നു. മുൻപ് മാനേജ്‌മെന്റുമായി നടത്തിയ ചർച്ചകൾ പരാജയപ്പെട്ടതിനെ തുടർന്ന് ശക്തമായ സമരത്തിലേക്ക് നീങ്ങിയ തൊഴിലാളികളാണ് ഇപ്പോൾ മന്ത്രിതല ചർച്ചയ്ക്ക് ശേഷം സമരം ഒത്തുതീർപ്പാക്കിയത്.
