മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടും വോട്ട് ചോർച്ചയ്‌ക്കെതിരെയും രാജ്യതലസ്ഥാനത്ത് ഇന്നും ഇന്ത്യാ സഖ്യത്തിന്റെ ശക്തമായ പ്രക്ഷോഭം. സുപ്രീം കോടതിയിലേക്ക് പ്രതിപക്ഷം പ്രഖ്യാപിച്ച മാർച്ച് ദില്ലിയിൽ ആരംഭിച്ചു. ലോക്സഭ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് അധ്യക്ഷൻ മല്ലികാർജ്ജുൻ ഖർഗെ, സി.പി.എം ജനറൽ സെക്രട്ടറി എം. എ. ബേബി, പ്രിയങ്ക ഗാന്ധി തുടങ്ങിയ ജനപ്രതിനിധികളും നേഹ ബോറ, യോഗേന്ദ്ര യാദവ് എന്നിവരടങ്ങുന്ന മുന്നണി നേതാക്കളും ബസുകളിലാണ് സുപ്രീം കോടതി പരിസരത്തേക്ക് തിരിഞ്ഞത്. പൊലീസ് തടയുന്ന ഇടം മുതൽ പ്രക്ഷോഭ കേന്ദ്രമാക്കാനാണ് ഇന്ത്യാ സഖ്യത്തിന്റെ തീരുമാനം. വലിയ അളവിൽ പ്രവർത്തകർ സുപ്രീം കോടതി പരിസരത്തേക്ക് ഒഴുകിയെത്തുന്നതോടെ നഗരം വീണ്ടും സംഘർഷഭരിതമാകാൻ സാധ്യതയേറി. സമാധാനപരമായ പ്രതിഷേധങ്ങൾക്ക് നേരെ പൊലീസിന്റെയും ബി.ജെ.പി ഗുണ്ടകളുടെയും ഭാഗത്തുനിന്ന് അതിക്രമങ്ങൾ ഉണ്ടായതായി ആരോപിച്ച രാഹുൽ ഗാന്ധി, ഭരണഘടന സംരക്ഷിക്കാൻ ഭേദമന്യേ എല്ലാവരും തെരുവിൽ അണിനിരക്കണമെന്ന് അഭ്യർത്ഥിച്ചു.
അതേസമയം, പ്രതിപക്ഷ നേതാക്കൾക്ക് സന്ദർശന അനുമതി നൽകാൻ ചീഫ് ജസ്റ്റിസ് സൂര്യകാന്ത് തയ്യാറായില്ല. വിഷയങ്ങൾ കോടതിയുടെ പരിഗണനയിലുള്ളതിനാൽ പ്രത്യേകം കണ്ട് നിവേദനം സ്വീകരിക്കുന്നത് ഉചിതമാകില്ലെന്ന് ചൂണ്ടിക്കാട്ടിയാണ് കൂടിക്കാഴ്ച നിഷേധിച്ചത്. ഭരണഘടനയുടെ 32-ാം അനുച്ഛേദപ്രകാരം സുപ്രീം കോടതിയെ സമീപിച്ചാൽ അടിയന്തരമായി പരിഗണിക്കാമെന്നും മൗലികാവകാശ സംരക്ഷണത്തിന് കോടതിയുടെ വാതിലുകൾ എപ്പോഴും തുറന്നിരിക്കുകയാണെന്നും ചീഫ് ജസ്റ്റിസ് വ്യക്തമാക്കി. നേരത്തെ പാർലമെന്റിൽ ചേർന്ന പ്രതിപക്ഷ യോഗത്തിൽ മമതാ ബാനർജിയാണ് സുപ്രീം കോടതിയെ സമീപിക്കാമെന്ന നിർദേശം മുന്നോട്ടുവെച്ചത്. കഴിഞ്ഞയാഴ്ച ഇന്ത്യാ സഖ്യം നടത്തിയ നാല് മാർച്ചുകൾക്ക് പിന്നാലെ നേതാക്കൾ വെള്ളിയാഴ്ച രാഷ്ട്രപതിക്കും നിവേദനം നൽകിയിരുന്നു.
