‘ഒരു രാജ്യം ഒരു തിരഞ്ഞെടുപ്പ്’ ബില്ലുമായി ബന്ധപ്പെട്ട് പാർലമെന്ററി സംയുക്ത സമിതിയുമായി (ജെ.പി.സി) നടത്താനിരുന്ന കൂടിക്കാഴ്ച സുപ്രീം കോടതി നിരസിച്ചു. വിഷയം ഭാവിയിൽ ഹർജിയായി കോടതിക്ക് മുന്നിലെത്താൻ സാധ്യതയുള്ളതിനാൽ ഇത്തരമൊരു കൂടിക്കാഴ്ച ഉചിതമല്ലെന്ന നിലപാട് പ്രതിപക്ഷവും കൈക്കൊണ്ടിരുന്നു. സുപ്രീം കോടതി സെക്രട്ടറി ജനറൽ തീരുമാനം രേഖാമൂലം ജെ.പി.സിയെ അറിയിച്ചതോടെ, ചീഫ് ജസ്റ്റിസുമായും മുതിർന്ന ജഡ്ജിമാരുമായും ഒക്ടോബർ 6-ന് നടത്താൻ നിശ്ചയിച്ചിരുന്ന യോഗം റദ്ദാക്കി. സുപ്രീം കോടതി ജഡ്ജിമാരെ കാണാനുള്ള നീക്കം അധികാര വിഭജന തത്വങ്ങളുടെ ലംഘനമാണെന്ന് മുതിർന്ന അഭിഭാഷകൻ കപിൽ സിബൽ രൂക്ഷമായി വിമർശിച്ചിരുന്നു. രാജ്യത്തിന്റെ ചരിത്രത്തിൽ ഇന്നുവരെ ഇത്തരമൊരു കൂടിക്കാഴ്ച നടന്നിട്ടില്ലെന്നും അദ്ദേഹം ചൂണ്ടിക്കാട്ടി.
ഒരേസമയം തിരഞ്ഞെടുപ്പ് നടത്തുന്നതിന് വഴിയൊരുക്കുന്ന ഭരണഘടനാ ഭേദഗതി ബിൽ, കേന്ദ്രഭരണപ്രദേശ നിയമ ഭേദഗതി ബിൽ എന്നിവ നിലവിൽ സംയുക്ത പാർലമെന്ററി സമിതിയുടെ പരിശോധനയിലാണ്. ബി.ജെ.പി എം.പി പി.പി. ചൗധരിയുടെ നേതൃത്വത്തിലുള്ള സമിതി, വിവിധ രാഷ്ട്രീയ പാർട്ടികൾ, ജനപ്രതിനിധികൾ, ഭരണഘടനാ വിദഗ്ധർ എന്നിവരുമായി ചർച്ചകൾ നടത്തിവരികയാണ്. ഇതിന്റെ ഭാഗമായി മുൻ ചീഫ് ജസ്റ്റിസുമാർ, മുൻ സുപ്രീം കോടതി ജഡ്ജിമാർ, മറ്റ് നിയമവിദഗ്ധർ എന്നിവരുമായി നേരത്തെ കൂടിയാലോചനകൾ നടത്തിയിരുന്നുവെങ്കിലും നിലവിലെ ജഡ്ജിമാരുമായുള്ള കൂടിക്കാഴ്ചയ്ക്ക് സുപ്രീം കോടതി അനുമതി നൽകിയില്ല.
