തിരുവനന്തപുരം ജില്ലയുടെ പുതിയ ജില്ലാ കളക്ടറായി അഞ്ജു കെ.എസ് ഔദ്യോഗികമായി ചുമതലയേറ്റു. സംസ്ഥാന ഭാഗ്യക്കുറി വകുപ്പ് ഡയറക്ടറായി സേവനമനുഷ്ഠിച്ചു വരികയായിരുന്ന അവരെ കളക്ടർ പദവിക്ക് പുറമേ വിഴിഞ്ഞം പോർട്ട് പ്രൊജക്ടിന്റെ പുനരധിവാസ ചുമതലകൂടി ഏൽപ്പിച്ചിട്ടുണ്ട്. 2017 ബാച്ച് കേരള കേഡർ ഐ.എ.എസ് ഉദ്യോഗസ്ഥയായ അഞ്ജു, ഇൻസ്ട്രുമെന്റേഷനിൽ ബി.ടെക് ബിരുദവും പബ്ലിക് മാനേജ്‌മെന്റിൽ ബിരുദാനന്തര ബിരുദവും പൂർത്തിയാക്കിയിട്ടുണ്ട്. നേരത്തെ പെരിന്തൽമണ്ണ സബ് കളക്ടർ, ആലപ്പുഴ ജില്ലാ ഡെവലപ്പ്‌മെന്റ് കമ്മീഷണർ, ചീഫ് സെക്രട്ടറിയുടെ സ്റ്റാഫ് ഓഫീസർ, കെ.എസ്.ബി.സി.ഡി.സി എം.ഡി, പട്ടികജാതി വികസന വകുപ്പ് ഡയറക്ടർ, കൃഷി-കർഷകക്ഷേമ വകുപ്പ് ഡയറക്ടർ തുടങ്ങിയ സുപ്രധാന പദവികളിൽ മികച്ച സേവനം അനുഷ്ഠിച്ച ശേഷമാണ് ഈ പുതിയ ചുമതലയിലെത്തുന്നത്.
പാലക്കാട് സ്വദേശിനിയായ അഞ്ജു കെ.എസിന്റെ ഭർത്താവ് നവറോഷും മകൻ അഥർവുമാണ്. നിലവിലുണ്ടായിരുന്ന ജില്ലാ കളക്ടർ അനു കുമാരി സംസ്ഥാന ജി.എസ്.ടി സ്പെഷ്യൽ കമ്മീഷണറായി നിയമിതയായതിനെ തുടർന്നാണ് പുതിയ നിയമനം.
