പോലീസിനെ വെല്ലുവിളിക്കുകയും ആഭ്യന്തരമന്ത്രിയെ ഭീഷണിപ്പെടുത്തുകയും ചെയ്ത കേസുകളിൽ അറസ്റ്റിലായ അർജുൻ ആയങ്കിയെ കണ്ണൂർ സൈബർ ക്രൈം പൊലീസിന്റെ കസ്റ്റഡിയിൽ മൂന്ന് ദിവസത്തേക്ക് കോടതി വിട്ടു. കൃത്യത്തിന് ഉപയോഗിച്ച ഐഫോൺ 16 പ്രോ ഫോൺ കണ്ടെത്താൻ കസ്റ്റഡിയിൽ ചോദ്യം ചെയ്യണമെന്ന പൊലീസിന്റെ ആവശ്യം കോടതി അംഗീകരിക്കുകയായിരുന്നു. എന്നാൽ ദേഹപരിശോധനയിൽ കണ്ടെത്തിയ ഫോണിന്റെ വിവരങ്ങൾ റിപ്പോർട്ടിൽ ഉൾപ്പെടുത്തിയിട്ടില്ലെന്ന് പ്രതിഭാഗം കോടതിയെ അറിയിച്ചു. കോടതിയിൽ നിന്ന് പുറത്തിറങ്ങുമ്പോൾ, എല്ലാം ചെയ്തത് താൻ തന്നെയാണെന്നും എല്ലാത്തിനും ഒരു കാരണമുണ്ടെന്നും കൈയിലെ പച്ചകുത്തിയത് ഉയർത്തിക്കാട്ടി അർജുൻ പ്രതികരിച്ചു. അതേസമയം, കീഴടങ്ങാനാണ് അർജുൻ തളിപ്പറമ്പിൽ നിന്ന് കണ്ണൂരിലേക്ക് വന്നതെന്ന് അദ്ദേഹത്തിന്റെ അഭിഭാഷക ഡെലീറ്റ ടൈറ്റസ് വ്യക്തമാക്കി. അതിനിടെ, സംഘടിത കുറ്റകൃത്യത്തിന് ഗൂഢാലോചന നടത്തിയ കേസിൽ പൊലീസ് നൽകിയ റിപ്പോർട്ടിന്റെ അടിസ്ഥാനത്തിൽ അർജുൻ ആയങ്കിയുടെ ജാമ്യം കോതമംഗലം മജിസ്ട്രേറ്റ് കോടതി റദ്ദാക്കുകയും ചെയ്തു.
