പ്രതിപക്ഷ പ്രതിഷേധങ്ങൾക്കിടയിലും പാർലമെന്റിന്റെ ഇരുസഭകളിലും പ്രമുഖ ബില്ലുകൾ പാസാക്കി. രാജ്യസഭയിൽ ധനമന്ത്രി നിർമല സീതാരാമൻ അവതരിപ്പിച്ച ബാങ്കേഴ്സ് ബുക്ക്സ് എവിഡൻസ് ബിൽ പ്രതിപക്ഷത്തിന്റെ ഇറങ്ങിപ്പോക്കിനിടെയാണ് പാസാക്കിയത്. സാമ്പത്തിക മേഖലയിൽ വലിയ മാറ്റങ്ങൾക്ക് വഴിവെക്കുന്ന നിർണായക ബില്ലാണിതെന്നും ഇത് കൂടുതൽ മെച്ചപ്പെടുത്താനുള്ള നിർദേശങ്ങൾ സ്വീകരിക്കാൻ തയ്യാറാണെന്നും വ്യക്തമാക്കിയ ധനമന്ത്രി, ബിൽ അവതരണ വേളയിൽ പ്രതിപക്ഷം സഭയിൽ നിന്ന് ഇറങ്ങിപ്പോയത് ദുഃഖകരമാണെന്നും കൂട്ടിച്ചേർത്തു. അതേസമയം, യു.പി.ഐ നിരക്കുകൾ ഉയർത്തുന്നത് സാധാരണക്കാരെ ബാധിക്കുമെന്ന് ജോൺ ബ്രിട്ടാസ് എം.പി സഭയിൽ ആശങ്ക ഉന്നയിച്ചു. വൻകിട വ്യവസായികളെ മാത്രമേ ഇത് ബാധിക്കൂ എന്ന കേന്ദ്ര സർക്കാർ വാദത്തിൽ വ്യക്തതയില്ലെന്നും വ്യവസായികൾക്കുണ്ടാകുന്ന ഭാരം ഒടുവിൽ താഴെത്തട്ടിലേക്ക് തന്നെ എത്തില്ലേ എന്നും അദ്ദേഹം ചോദിച്ചു.
മറുവശത്ത്, ട്രൈബ്യൂണൽ പരിഷ്കരണ ബിൽ ലോക്‌സഭയും പാസാക്കി. പാർലമെന്റിന്റെ വർഷകാല സമ്മേളനത്തിന്റെ അവസാന വാരത്തിലും പ്രതിപക്ഷ പ്രതിഷേധം ശക്തമായി തുടർന്നതോടെ സർക്കാരും വിട്ടുവീഴ്ചയ്ക്ക് തയ്യാറായി. വിഷയത്തിലെ പോലീസ് നടപടിയെക്കുറിച്ച് കേന്ദ്ര ആഭ്യന്തരമന്ത്രി അമിത് ഷാ പാർലമെന്റിൽ പ്രസ്താവന നടത്തുമെന്ന് കേന്ദ്രമന്ത്രി കിരൺ റിജിജു അറിയിച്ചു. എന്നാൽ അമിത് ഷായുടെ വിശദീകരണം കേൾക്കുന്നതുവരെ പ്രതിഷേധം അവസാനിപ്പിക്കില്ലെന്ന നിലപാടിൽ പ്രതിപക്ഷം ഉറച്ചുനിന്നതോടെ സഭാ നടപടികൾ വീണ്ടും ബഹളത്തിൽ മുങ്ങുകയായിരുന്നു.
