നീറ്റ് പരീക്ഷാ ക്രമക്കേടിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ട് കോക്രോച്ച് ജനതാ പാർട്ടി ആരംഭിച്ച സമരത്തിന് കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികൾ പൂർണ്ണ പിന്തുണ പ്രഖ്യാപിച്ചതോടെ കേന്ദ്ര സർക്കാർ കടുത്ത പ്രതിരോധത്തിലായി. ഡൽഹിയിൽ കഴിഞ്ഞ രണ്ടുദിവസമായി പൊലീസും സമരക്കാരും തമ്മിൽ ശക്തമായ ഏറ്റുമുട്ടൽ തുടരുകയാണ്. പ്രധാനമന്ത്രിയുടെ വസതിയിലേക്ക് മാർച്ച് നടത്തിയ രാഹുൽ ഗാന്ധി ഉൾപ്പെടെയുള്ള മുതിർന്ന നേതാക്കളെ പോലീസ് ബലപ്രയോഗത്തിലൂടെ വലിച്ചിഴച്ച് നീക്കിയതോടെ പ്രതിഷേധം കൂടുതൽ രൂക്ഷമായിട്ടുണ്ട്.
വിഷയം പാർലമെന്റിൽ ചർച്ച ചെയ്യണമെന്നും പരീക്ഷാവീഴ്ചയിലും പൊലീസ് നടപടിയിലും സർക്കാർ മറുപടി നൽകണമെന്നും രാഹുൽ ഗാന്ധി ആവശ്യപ്പെട്ടു. വിദ്യാഭ്യാസ മന്ത്രിയുടെ രാജിയാവശ്യപ്പെട്ട് പ്രതിപക്ഷം സഭ സ്തംഭിപ്പിക്കാൻ നീക്കം നടത്തുന്നതിനാൽ ഇന്നും പാർലമെന്റ് പ്രക്ഷുബ്ധമാകാനാണ് സാധ്യത. നിർണ്ണായക ബില്ലുകൾ അവതരിപ്പിക്കാൻ സർക്കാർ ഒരുങ്ങുമ്പോൾ, ആവശ്യങ്ങൾ അംഗീകരിച്ചില്ലെങ്കിൽ സമരം വീണ്ടും തെരുവിലേക്ക് വ്യാപിപ്പിക്കാനാണ് പ്രതിപക്ഷ തീരുമാനം. അതേസമയം, അനുനയ നീക്കത്തിന്റെ ഭാഗമായി കേന്ദ്രമന്ത്രിമാരായ ജെ.പി. നഡ്ഡയും ജിതേന്ദ്ര സിങും ആശുപത്രിയിൽ കഴിയുന്ന സോനം വാങ്ചുകിനെ സന്ദർശിച്ചെങ്കിലും ധർമേന്ദ്ര പ്രധാൻ രാജിവെക്കുന്നത് വരെ സമരത്തിൽ നിന്ന് പിന്നോട്ടില്ലെന്ന ഉറച്ച നിലപാടിലാണ് സി.ജെ.പി.
