ലക്‌നൗ: ഉത്തർപ്രദേശിൽ ബീഫ് (പശുവിറച്ചി) കൈവശം വെക്കുകയും പാകം ചെയ്യുകയും ചെയ്തുവെന്ന ആരോപണത്തെ തുടർന്ന് മൂന്ന് സ്ത്രീകളെ പോലീസ് അറസ്റ്റ് ചെയ്തു. യുപിയിലെ കൗശാംബി ജില്ലയിലാണ് പരക്കെ ചർച്ചയായ ഈ സംഭവം നടന്നത്. രഹസ്യവിവരം ലഭിച്ചതിന്റെ അടിസ്ഥാനത്തിൽ ഇവരുടെ വീട്ടിൽ പോലീസ് സംഘം നടത്തിയ അപ്രതീക്ഷിത പരിശോധനയിലാണ് സ്ത്രീകൾ പിടിയിലാകുന്നത്. പരിശോധനയിൽ ഇവരുടെ വീട്ടിൽ നിന്നും പാകം ചെയ്തതും അല്ലാത്തതുമായ ഒരു കിലോ വീതം ഇറച്ചി കണ്ടെടുത്തതായി പോലീസ് വൃത്തങ്ങൾ അറിയിച്ചു. അറസ്റ്റിലായ സ്ത്രീകൾക്കെതിരെ സംസ്ഥാനത്തെ കർശനമായ ഗോവധ നിരോധന നിയമപ്രകാരമാണ് കേസ് രജിസ്റ്റർ ചെയ്തിരിക്കുന്നത്.
കോടതിയിൽ ഹാജരാക്കിയ പ്രതികളായ മൂന്ന് സ്ത്രീകളെയും നിലവിൽ ജുഡീഷ്യൽ കസ്റ്റഡിയിൽ വിട്ടിരിക്കുകയാണ്. അതേസമയം, പരിശോധനയ്ക്കായി പോലീസ് സ്ഥലത്തെത്തിയ സമയം വീട്ടിൽ നിന്നും ഓടി രക്ഷപ്പെട്ട പുരുഷന്മാർക്കായി പോലീസ് അന്വേഷണം ഊർജ്ജിതമാക്കിയിട്ടുണ്ട്. സംഭവസ്ഥലത്തുനിന്ന് പിടിച്ചെടുത്ത ഇറച്ചി ബീഫ് തന്നെയാണോ എന്ന് ഔദ്യോഗികമായി സ്ഥിരീകരിക്കുന്നതിനായി ഇതിന്റെ സാമ്പിളുകൾ ഫോറൻസിക് പരിശോധനയ്ക്ക് അയച്ചിരിക്കുകയാണെന്നും പോലീസ് വ്യക്തമാക്കുന്നു.
