സംസ്ഥാനത്ത് ആശങ്ക വർദ്ധിപ്പിച്ചുകൊണ്ട് വീണ്ടും ഷിഗെല്ല മരണ വാർത്ത പുറത്തുവരുന്നു. മലപ്പുറം കോഡൂർ സ്വദേശിയായ രണ്ടാം ക്ലാസ് വിദ്യാർത്ഥി ആർജവ് (7) ആണ് കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെ മരണമടഞ്ഞത്. ഈ മാസം 12-നാണ് പനിയും വയറിളക്കവും കടുത്തതിനെ തുടർന്ന് കുട്ടിയെ ആശുപത്രിയിൽ പ്രവേശിപ്പിച്ചത്. ആദ്യഘട്ടത്തിൽ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ആരോഗ്യനില വഷളായതോടെ വിദഗ്ധ ചികിത്സയ്ക്കായി കോഴിക്കോട് മെഡിക്കൽ കോളജിലേക്ക് മാറ്റുകയായിരുന്നു.
നിലവിൽ സംസ്ഥാനത്ത് ഷിഗെല്ല രോഗബാധ പടരുന്നതായാണ് പുറത്തുവരുന്ന കണക്കുകൾ വ്യക്തമാക്കുന്നത്. കഴിഞ്ഞ ദിവസം മാത്രം കോഴിക്കോട് ജില്ലയിൽ കുന്ദമംഗലം സ്വദേശിയായ ഒരു വയസ്സുകാരനും പയ്യോളി സ്വദേശിയായ ഒൻപത് വയസ്സുകാരനും ഉൾപ്പെടെ രണ്ട് പേർക്ക് കൂടി രോഗം സ്ഥിരീകരിച്ചു. ഇതുവരെ കേരളത്തിൽ ആകെ 135 ഓളം ഷിഗെല്ല കേസുകളാണ് റിപ്പോർട്ട് ചെയ്യപ്പെട്ടിട്ടുള്ളത്. ഇതിൽ പകുതിയോളം കേസുകളും, അതായത് 68 എണ്ണവും കോഴിക്കോട് ജില്ലയിൽ നിന്നുള്ളതാണ്. ഈ മാസം മാത്രം ജില്ലയിൽ 13 ഓളം പേർക്ക് രോഗം സ്ഥിരീകരിച്ചിട്ടുണ്ട്. ഇതുവരെ സംസ്ഥാനത്ത് റിപ്പോർട്ട് ചെയ്ത നാല് ഷിഗെല്ല മരണങ്ങളിൽ മൂന്നും കോഴിക്കോട് ജില്ലയിൽ നിന്നാണെന്നത് ആരോഗ്യവകുപ്പിന് വലിയ ആശങ്ക സൃഷ്ടിക്കുന്നുണ്ട്.
