സിക്കിം സംസ്ഥാന ദിനാഘോഷങ്ങളുടെ അമ്പതാം വാർഷികാഘോഷങ്ങൾക്ക് മാറ്റുകൂട്ടി പ്രധാനമന്ത്രി നരേന്ദ്ര മോദിയുടെ ഗാങ്ടോക്ക് സന്ദർശനം. സമാപന ചടങ്ങിൽ പങ്കെടുക്കാനെത്തിയ അദ്ദേഹം വിദ്യാർത്ഥികൾക്കൊപ്പം ഫുട്ബോൾ മൈതാനത്തിറങ്ങിയത് വേറിട്ടൊരു കാഴ്ചയായി. ട്രാക്ക് സ്യൂട്ടും ബൂട്ടുമണിഞ്ഞ് ആവേശത്തോടെ പന്തുതട്ടുന്ന ദൃശ്യങ്ങൾ “യുവസുഹൃത്തുക്കൾക്കൊപ്പം ചിലവഴിച്ച ഊർജ്ജസ്വലമായ പ്രഭാതം” എന്ന കുറിപ്പോടെ പ്രധാനമന്ത്രി തന്നെയാണ് സാമൂഹിക മാധ്യമങ്ങളിലൂടെ പങ്കുവെച്ചത്. യുവജനങ്ങൾക്കിടയിൽ ഫിറ്റ്നസിനെക്കുറിച്ചും കായിക സംസ്കാരത്തെക്കുറിച്ചും ബോധവൽക്കരണം നൽകുക എന്ന ലക്ഷ്യത്തോടെയാണ് അദ്ദേഹം കുട്ടികൾക്കൊപ്പം സമയം ചിലവഴിച്ചത്. ഇതിന് പുറമെ റാങ്പോയിലെ പുതിയ ഇൻഡോർ ക്രിക്കറ്റ് സ്റ്റേഡിയം ഉൾപ്പെടെയുള്ള കായിക കേന്ദ്രങ്ങളുടെ ഉദ്ഘാടനവും അദ്ദേഹം നിർവ്വഹിച്ചു.
സംസ്ഥാന ദിനാഘോഷങ്ങളുടെ ഭാഗമായി സിക്കിമിന്റെ വികസന കുതിപ്പിന് കരുത്തേകുന്ന 4,000 കോടി രൂപയുടെ ബൃഹദ് പദ്ധതികൾക്കാണ് പ്രധാനമന്ത്രി ഇന്ന് തുടക്കം കുറിക്കുന്നത്. അടിസ്ഥാന സൗകര്യ വികസനം, ആരോഗ്യം, വിദ്യാഭ്യാസം, കൃഷി തുടങ്ങിയ വിവിധ മേഖലകളിലായി മുപ്പതോളം പദ്ധതികളുടെ ഉദ്ഘാടനവും തറക്കല്ലിടലും ഇതിൽ ഉൾപ്പെടുന്നു. ഗാങ്ടോക്കിലെ പൽജോർ സ്റ്റേഡിയത്തിൽ നടക്കുന്ന വിപുലമായ ജനസമ്മേളനത്തിൽ അദ്ദേഹം സംസ്ഥാനത്തെ ജനങ്ങളെ അഭിസംബോധന ചെയ്യും. സിക്കിം ഇന്ത്യൻ യൂണിയന്റെ ഭാഗമായതിന്റെ അമ്പതാം വാർഷിക വേളയിൽ എത്തിയ ഈ വികസന പദ്ധതികൾ സംസ്ഥാനത്തിന്റെ മുഖച്ഛായ മാറ്റുമെന്നാണ് പ്രതീക്ഷിക്കപ്പെടുന്നത്.
