പാകിസ്ഥാൻ സൂപ്പർ ലീഗിലെ മത്സരത്തിന് പിന്നാലെ നടന്ന വാർത്താ സമ്മേളനത്തിൽ ഇന്ത്യൻ ബാറ്റിംഗ് ഇതിഹാസം വിരാട് കോഹ്ലിയുമായുള്ള താരതമ്യം പെഷവാർ സാൽമി നായകൻ ബാബർ അസമിനെ പ്രകോപിപ്പിച്ചു. ഹൈദരാബാദ് കിംഗ്സ്മാനെതിരായ മത്സരത്തിൽ ടീമിനായി 43 റൺസ് നേടി ടോപ് സ്കോററായെങ്കിലും, ബാബർ ക്രീസിലുണ്ടായിരുന്നിട്ടും കളി അവസാന നിമിഷം വരെ നീണ്ടുപോയതിനെക്കുറിച്ചുള്ള ചോദ്യമാണ് തർക്കത്തിന് കാരണമായത്. കോഹ്ലി ഇത്തരത്തിലുള്ള മത്സരങ്ങൾ അനായാസം ഫിനിഷ് ചെയ്യാറുണ്ടെന്നും എന്നാൽ ബാബറിന് അതിന് സാധിക്കുന്നില്ലെന്നും ചൂണ്ടിക്കാട്ടിയ മാധ്യമപ്രവർത്തകനോട് ബാബർ ക്ഷോഭിച്ചു. ഇത്തരം താരതമ്യങ്ങൾ ഇവിടെ അവസാനിപ്പിക്കണമെന്നും അവ നിങ്ങളുടെ പക്കൽ തന്നെ വെച്ചാൽ മതി എന്നുമായിരുന്നു ബാബറിന്റെ മറുപടി. താൻ മത്സരങ്ങൾ ഫിനിഷ് ചെയ്യുന്നില്ല എന്നത് വെറും തെറ്റിദ്ധാരണ മാത്രമാണെന്നും അദ്ദേഹം കൂട്ടിച്ചേർത്തു.
മത്സരത്തിൽ ഹൈദരാബാദ് ഉയർത്തിയ 146 റൺസെന്ന ചെറിയ ലക്ഷ്യം പിന്തുടർന്ന പെഷവാർ സാൽമിക്ക് അവസാന പന്തിൽ മാത്രമാണ് വിജയം നേടാനായത്. ബാബർ അസം ക്രീസിലുണ്ടായിരുന്നിട്ടും വിജയം ഇത്രത്തോളം വൈകിയത് ടി20 ഫോർമാറ്റിലെ അദ്ദേഹത്തിന്റെ സ്ട്രൈക്ക് റേറ്റിനെക്കുറിച്ചുള്ള വിമർശനങ്ങൾ വീണ്ടും സജീവമാക്കി. ഈ സീസണിലെ രണ്ട് മത്സരങ്ങളിൽ നിന്നായി 126.15 സ്ട്രൈക്ക് റേറ്റിൽ 82 റൺസാണ് ബാബറിന്റെ സമ്പാദ്യം. പാകിസ്ഥാനിലെ ഏറ്റവും മികച്ച ബാറ്ററായി വാഴ്ത്തപ്പെടുമ്പോഴും നിർണ്ണായക ഘട്ടങ്ങളിൽ വേഗത്തിൽ റൺസ് ഉയർത്താനും കളി ഫിനിഷ് ചെയ്യാനുമുള്ള ബാബറിന്റെ കഴിവിനെതിരെ മുൻപും നിരവധി വിമർശനങ്ങൾ ഉയർന്നിട്ടുണ്ട്. ഹൈദരാബാദിനെതിരെ ബാബർ പുറത്തായ ശേഷം കളി കൈവിട്ടുപോകുന്ന സാഹചര്യം ഉണ്ടായതാണ് ആരാധകരെയും വിമർശകരെയും ഒരുപോലെ ചൊടിപ്പിച്ചത്.
