മസ്കറ്റ്: ഒമാനിലെ മത്രാ വിലായത്തിൽ സ്വർണക്കടയുടെ ഭിത്തി കുത്തിത്തുറന്ന് വൻ കവർച്ച നടത്താൻ ശ്രമിച്ച കേസിൽ നാല് ഏഷ്യൻ സ്വദേശികളെ റോയൽ ഒമാൻ പൊലീസ് അറസ്റ്റ് ചെയ്തു. കടയുടെ ചുമർ പൊളിച്ച് അകത്തുകടന്ന് സ്വർണാഭരണങ്ങൾ മുഴുവൻ കൈക്കലാക്കാനായിരുന്നു പ്രതികളുടെ പദ്ധതിയെന്ന് അന്വേഷണത്തിൽ വ്യക്തമായിട്ടുണ്ട്. കവർച്ചാശ്രമം ശ്രദ്ധയിൽപ്പെട്ടതിനെ തുടർന്ന് മസ്കറ്റ് ഗവർണറേറ്റ് പൊലീസ് കമാൻഡ് വടക്കൻ അൽ ബതിന, ദോഫാർ പൊലീസ് കമാൻഡുകൾ എന്നിവയുടെ സഹകരണത്തോടെ വ്യാപകമായ അന്വേഷണവും തിരച്ചിലും നടത്തിയാണ് പ്രതികളെ വലയിലാക്കിയത്. അറസ്റ്റിലായ നാല് പേരും ഏഷ്യൻ വംശജരാണെന്ന് പൊലീസ് സ്ഥിരീകരിച്ചിട്ടുണ്ടെങ്കിലും ഇവർ ഏത് രാജ്യക്കാരാണെന്ന വിവരം അധികൃതർ പുറത്തുവിട്ടിട്ടില്ല.
സമയോചിതമായ ഇടപെടലിലൂടെ വൻ കവർച്ചാശ്രമം തടയാൻ കഴിഞ്ഞ പൊലീസ്, പ്രതികൾക്കെതിരെ സ്വത്ത് നശിപ്പിക്കൽ, കവർച്ചാശ്രമം തുടങ്ങിയ ഗുരുതരമായ കുറ്റങ്ങളാണ് ചുമത്തിയിരിക്കുന്നത്. പിടിയിലായവർക്കെതിരെയുള്ള നിയമനടപടികൾ പുരോഗമിക്കുകയാണെന്നും കേസിന്റെ തുടർനടപടികൾ പൂർത്തിയാക്കിവരികയാണെന്നും റോയൽ ഒമാൻ പൊലീസ് അറിയിച്ചു. രാജ്യത്തെ സുരക്ഷാ സംവിധാനങ്ങളെ വെല്ലുവിളിച്ച് വ്യാപാര സ്ഥാപനങ്ങളിൽ കവർച്ച നടത്താൻ തുനിയുന്നവർക്കെതിരെ വിട്ടുവീഴ്ചയില്ലാത്ത ശക്തമായ നടപടികൾ തുടരുമെന്ന് സുരക്ഷാ അധികൃതർ കർശന മുന്നറിയിപ്പ് നൽകിയിട്ടുണ്ട്.
