അമേരിക്കയിൽ നിർണായകമായ ഇടക്കാല തിരഞ്ഞെടുപ്പ് നാളെ നടക്കും. പ്രസിഡന്റ് ഡോണൾഡ് ട്രംപിന്റെയും ഭരണകക്ഷിയായ റിപ്പബ്ലിക്കൻ പാർട്ടിയുടെയും നയങ്ങൾക്കുള്ള ജനവിധിയായി വിലയിരുത്തപ്പെടുന്ന ഈ തിരഞ്ഞെടുപ്പ്, വാഷിംഗ്ടണിലെ രാഷ്ട്രീയ അധികാര സമവാക്യങ്ങളിൽ മാറ്റം വരുത്താൻ സാധ്യതയുണ്ട്. ജനപ്രതിനിധി സഭയിലെ മുഴുവൻ 435 സീറ്റുകളിലേക്കും സെനറ്റിലെ 35 സീറ്റുകളിലേക്കുമാണ് 21 കോടി വോട്ടർമാർ വിധിയെഴുതുന്നത്. ഇതിനുപുറമേ, യു.എസ് സ്റ്റേറ്റ് സെക്രട്ടറിയായി ചുമതലയേറ്റ മാർക്കോ റൂബിയോ ഒഴിഞ്ഞ ഫ്ലോറിഡയിലെയും, വൈസ് പ്രസിഡന്റായ ജെ.ഡി. വാൻസ് ഒഴിഞ്ഞ ഒഹായോയിലെയും സെനറ്റ് സീറ്റുകളിലേക്ക് പ്രത്യേക തിരഞ്ഞെടുപ്പും നടക്കും. കൂടാതെ 36 സംസ്ഥാനങ്ങളിൽ ഗവർണർമാരെ തിരഞ്ഞെടുക്കാനുള്ള വോട്ടെടുപ്പും നാളെയാണ്.
നിലവിൽ ജനപ്രതിനിധി സഭയിൽ കേവല ഭൂരിപക്ഷമായ 218 തികയ്ക്കാൻ റിപ്പബ്ലിക്കൻ പാർട്ടിക്ക് ഒരു സ്വതന്ത്രന്റെ പിന്തുണയോടെ 219 സീറ്റുകളാണുള്ളത്. ഡെമോക്രാറ്റുകൾക്ക് 214 സീറ്റുകളുമുണ്ട്. അതേസമയം സെനറ്റിൽ റിപ്പബ്ലിക്കൻ പാർട്ടിക്ക് 53-ഉം ഡെമോക്രാറ്റുകൾക്ക് 45-ഉം സീറ്റുകളാണുള്ളത്. രണ്ട് സീറ്റുകളിൽ സ്വതന്ത്രർ ഉള്ളപ്പോൾ രണ്ട് സീറ്റുകൾ ഒഴിഞ്ഞുകിടക്കുകയാണ്. ‘ഡിസിഷൻ ഡെസ്ക് എച്ച്ക്യു’ ഉൾപ്പെടെയുള്ള സർവേകൾ ജനപ്രതിനിധി സഭയിൽ ഡെമോക്രാറ്റിക് പാർട്ടിക്ക് മുൻതൂക്കം പ്രവചിക്കുമ്പോൾ, സെനറ്റിലെ പോരാട്ടം പ്രവചനാതീതമായി തുടരുന്നു. വർദ്ധിച്ചുവരുന്ന ജീവിതച്ചെലവ്, ഇന്ധനവില, ഇറാൻ സംഘർഷം, കുടിയേറ്റ നയങ്ങൾ, ട്രംപിന്റെ ജനപ്രീതിയിലുണ്ടായ ഇടിവ് എന്നിവയാണ് തിരഞ്ഞെടുപ്പിലെ പ്രധാന ചർച്ചാവിഷയങ്ങൾ. ഡെമോക്രാറ്റുകൾ ഇരുസഭകളിലും ഭൂരിപക്ഷം നേടിയാൽ ട്രംപിന്റെ തുടർ നിയമനിർമ്മാണങ്ങൾക്ക് അത് വലിയ തിരിച്ചടിയാകും. തിരഞ്ഞെടുക്കപ്പെടുന്ന പുതിയ സഭ വരുന്ന ജനുവരി മൂന്നിനാണ് അധികാരമേൽക്കുക.
