നോട്ടീസ് പോലും നൽകാതെ പിരിച്ചുവിട്ട നടപടിക്കെതിരെ കോഴിക്കോട് കളക്ടറേറ്റിന് മുന്നിൽ പി.എസ്.സി. വഴി നിയമനം ലഭിച്ച സ്ഥിരം ജീവനക്കാർ നടത്തുന്ന കുത്തിയിരിപ്പ് സമരം 20 മണിക്കൂർ പിന്നിട്ടു. അനർഹമായി നൽകിയ സ്ഥാനക്കയറ്റം ട്രിബ്യൂണൽ ഉത്തരവ് പ്രകാരം റദ്ദാക്കിയതോടെ, മുൻ തസ്തികയിൽ ജോലി ചെയ്തിരുന്നവർ തിരിച്ചെത്തിയതിനെ തുടർന്നാണ് രണ്ടര വർഷമായി സർവീസിലുള്ള അഞ്ച് ടൈപ്പിസ്റ്റ് ജീവനക്കാർക്ക് ജോലി നഷ്ടമായത്. ക്ലാർക്ക് കം ടൈപ്പിസ്റ്റ് തസ്തികയിൽ ചട്ടവിരുദ്ധമായി നൽകിയ സ്ഥാനക്കയറ്റം റദ്ദാക്കിയപ്പോൾ ഉണ്ടായ ഈ ഭരണപരമായ മാറ്റമാണ് അഞ്ച് വനിതാ ജീവനക്കാരുടെ തൊഴിൽ ഒറ്റരാത്രികൊണ്ട് ഇല്ലാതാക്കിയത്.
കളക്ടറുടെ നിയമന ഉത്തരവോടെ സർവീസിൽ തുടരുകയായിരുന്ന തങ്ങളെ, അവധി ദിനത്തിന്റെ തലേന്ന് രാത്രി വാട്സ്ആപ്പ് സന്ദേശത്തിലൂടെയാണ് പിരിച്ചുവിട്ട വിവരം അറിയിച്ചതെന്ന് ജീവനക്കാർ ആരോപിക്കുന്നു. പലർക്കും ഔദ്യോഗിക മെമ്മോ പോലും ലഭിച്ചിട്ടില്ല. മുഖ്യമന്ത്രി അടക്കമുള്ളവർക്ക് പരാതി നൽകിയിട്ടും നടപടിയുണ്ടാകാത്തതിനെ തുടർന്നാണ് ഇവർ സമരം ആരംഭിച്ചത്. ജോലിയിൽ തിരിച്ചെടുക്കുന്നത് വരെ കളക്ടറേറ്റ് പടിക്കൽ സമരം തുടരുമെന്ന് പിരിച്ചുവിടപ്പെട്ട ജീവനക്കാർ വ്യക്തമാക്കി.
