സംസ്ഥാനത്തെ സർക്കാർ ആശുപത്രികളിൽ രൂക്ഷമായ മരുന്ന് ക്ഷാമം തുടരുന്നതിനിടയിൽ, കുട്ടികൾക്കുള്ള പ്രതിരോധ മരുന്നുകളുടെ വിതരണവും പൂർണ്ണമായി നിലച്ച അവസ്ഥയിലാണ്. അഞ്ചു വയസ്സുവരെയുള്ള കുട്ടികൾക്ക് ആറുമാസം കൂടുമ്പോൾ നൽകേണ്ട വിറ്റാമിൻ എ സിറവും മറ്റ് പ്രതിരോധ വാക്സിനുകളും ആശുപത്രികളിൽ ലഭ്യമല്ലെന്ന് മാതാപിതാക്കൾ പരാതിപ്പെടുന്നു. കഴിഞ്ഞ രണ്ടു മാസത്തിലേറെയായി തുടരുന്ന ഈ പ്രതിസന്ധി കുഞ്ഞുങ്ങളുടെ ആരോഗ്യത്തെ ബാധിക്കുമെന്ന ആശങ്ക ഉയർത്തുന്നുണ്ട്. പ്രതിരോധ മരുന്നുകൾക്ക് പുറമേ പഞ്ഞി മുതൽ ജീവിതശൈലീ രോഗങ്ങൾക്കുള്ള മരുന്നുകൾ വരെ ആശുപത്രികളിൽ കിട്ടാനില്ലാത്ത അവസ്ഥയാണുള്ളത്. പനിയടക്കമുള്ള പകർച്ചവ്യാധികൾ പടർന്നുപിടിക്കുന്ന സാഹചര്യത്തിൽ മരുന്ന് ക്ഷാമം കൂടുതൽ രൂക്ഷമായത് രോഗികളെ വലിയ തോതിൽ ദുരിതത്തിലാക്കുന്നു.
അതേസമയം, പ്രതിസന്ധി പരിഹരിക്കുന്നത് സംബന്ധിച്ച് ആരോഗ്യവകുപ്പിന് വ്യക്തമായ മറുപടിയില്ലെങ്കിലും സ്ഥിതിഗതികൾ നിയന്ത്രണവിധേയമാക്കാൻ അടിയന്തര നീക്കങ്ങൾ ആരംഭിച്ചിട്ടുണ്ട്. ലഭ്യമാകാതിരുന്ന മരുന്നുകളുടെ ടെൻഡർ നടപടികൾ കെ.എം.എസ്.സി.എൽ (KMSCL) അടിയന്തര യോഗം ചേർന്ന് പൂർത്തിയാക്കി. 28 ഇനം പ്രധാന മരുന്നുകൾ ഈ മാസം പകുതിയോടെ ആശുപത്രികളിൽ എത്തിക്കാനാണ് ആരോഗ്യവകുപ്പിന്റെ ശ്രമം. കൂടാതെ, ആശുപത്രി തലത്തിൽ ലോക്കൽ പർച്ചേസിലൂടെ അത്യാവശ്യ മരുന്നുകൾ ഉറപ്പാക്കാനും നിർദ്ദേശം നൽകിയിട്ടുണ്ട്. എങ്കിലും അടിയന്തരമായി സ്റ്റോക്ക് പുനഃസ്ഥാപിച്ചില്ലെങ്കിൽ സംസ്ഥാനത്തെ പൊതുജനാരോഗ്യ മേഖല വലിയ പ്രതിസന്ധിയിലേക്ക് കൂപ്പുകുത്തും.
