സ്മാർട്ട്ഫോൺ ക്യാമറ രംഗത്തെ പ്രമുഖ സ്റ്റാർട്ടപ്പായ ‘ഗ്ലാസ് ഇമേജിങ്’ സ്വന്തമാക്കി ചാറ്റ്ജിപിടിയുടെ നിർമാതാക്കളായ ഓപ്പൺഎഐ. ആപ്പിളിലെ മുൻ എൻജിനീയർമാർ ചേർന്ന് രൂപീകരിച്ച ഈ കമ്പനിയെ സ്വന്തമാക്കുന്നതിലൂടെ സ്വന്തമായി ഹാർഡ്‌വെയർ ഉൽപ്പന്നങ്ങൾ വിപണിയിലെത്തിക്കാനുള്ള നീക്കം ഓപ്പൺഎഐ കൂടുതൽ ശക്തമാക്കുകയാണ്. ഏകദേശം 300 ദശലക്ഷത്തിലധികം ഡോളറിനാണ് ഈ കരാറെന്ന് വാൾ സ്ട്രീറ്റ് ജേർണൽ റിപ്പോർട്ട് ചെയ്തു. ആപ്പിളിന്റെ പോർട്രെയ്റ്റ് മോഡ് സാങ്കേതികവിദ്യ വികസിപ്പിച്ച സംഘത്തിന് നേതൃത്വം നൽകിയ സിവ് അറ്റാർ, ടോം ബിഷപ്പ് എന്നിവർ ചേർന്ന് 2019-ൽ കാലിഫോർണിയ ആസ്ഥാനമായാണ് ഗ്ലാസ് ഇമേജിങ് ആരംഭിച്ചത്. ഏറ്റെടുക്കലിന് മുൻപായി വിവിധ നിക്ഷേപകരിൽ നിന്നായി 30 ദശലക്ഷം ഡോളറോളം ഫണ്ട് സമാഹരിച്ചിരുന്ന ഈ കമ്പനി, നിർമ്മിത ബുദ്ധി ഉപയോഗിച്ച് സ്മാർട്ട്ഫോൺ ക്യാമറകളുടെ ഭൗതിക പരിമിതികൾ പരിഹരിക്കുകയാണ് ചെയ്യുന്നത്. ഫോട്ടോ എടുത്ത ശേഷം എഡിറ്റ് ചെയ്യുന്ന രീതിക്ക് പകരം, ഷട്ടർ ബട്ടൺ അമർത്തുന്ന നിമിഷത്തിൽ തന്നെ ചിത്രത്തിന്റെ ഗുണനിലവാരം വർദ്ധിപ്പിക്കാൻ ഇവരുടെ ന്യൂറൽ നെറ്റ്‌വർക്ക് സാങ്കേതികവിദ്യയ്ക്ക് കഴിയും.
സ്വന്തമായി സ്മാർട്ട്ഫോണുകൾ, ഇയർബഡ്സുകൾ, എഐ കംപാനിയൻ ഉപകരണങ്ങൾ എന്നിവ വികസിപ്പിക്കാനുള്ള സാധ്യതകൾ ആരാഞ്ഞുവരുന്ന ഓപ്പൺഎഐക്ക് ഈ ഏറ്റെടുക്കൽ വലിയ ഊർജ്ജം നൽകും. ആപ്പിളിന്റെ മുൻ ചീഫ് ഡിസൈനറായ ജോണി ഐവുമായി ചേർന്ന് പുതിയ ഉപകരണങ്ങൾക്കായി പ്രവർത്തിക്കുന്ന ഓപ്പൺഎഐക്ക്, ആപ്പിൾ ക്യാമറ സാങ്കേതികവിദ്യയിൽ മികച്ച പരിചയസമ്പത്തുള്ള ഒരു ടീമിനെ തന്നെ ഒപ്പം ലഭിക്കുന്നത് ഇമേജിങ് ശേഷി കൂട്ടാൻ സഹായകമാകും. അതേസമയം, വാർത്തയോട് ഓപ്പൺഎഐ ഇതുവരെ ഔദ്യോഗികമായി പ്രതികരിച്ചിട്ടില്ല.
