യുഎഇയിൽ ചില ഉൾപ്രദേശങ്ങളിൽ താപനില 50 ഡിഗ്രി സെൽഷ്യസ് വരെ ഉയരുമ്പോഴും രാജ്യത്തിന്റെ കിഴക്കൻ, തെക്കൻ മേഖലകളിൽ വീണ്ടും വേനൽമഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. രാജ്യത്ത് പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെങ്കിലും, ഉച്ചയ്ക്ക് ശേഷം മഴമേഘങ്ങൾ രൂപപ്പെടാൻ സാധ്യതയുണ്ട്. ഉൾപ്രദേശങ്ങളിൽ 45 മുതൽ 50 ഡിഗ്രി സെൽഷ്യസ് വരെയും, തീരദേശങ്ങളിലും ദ്വീപുകളിലും 39 മുതൽ 45 ഡിഗ്രി സെൽഷ്യസ് വരെയും, മലയോര മേഖലകളിൽ 33 മുതൽ 39 ഡിഗ്രി സെൽഷ്യസ് വരെയും താപനില രേഖപ്പെടുത്തും. കാറ്റിന്റെ വേഗത ചിലപ്പോൾ മണിക്കൂറിൽ 40 കിലോമീറ്റർ വരെ ഉയരാൻ ഇടയുള്ളതിനാൽ പൊടിക്കാറ്റിനും സാധ്യത കൽപ്പിക്കപ്പെടുന്നു.
ഇതിനിടെ കേരളത്തിൽ കാലവർഷ മഴയിൽ 22 ശതമാനം കുറവ് രേഖപ്പെടുത്തിയിട്ടുണ്ട്. ഏഴ് ജില്ലകളിൽ പ്രതീക്ഷിച്ച മഴ ലഭിച്ചില്ലെങ്കിലും പത്തനംതിട്ടയിലും തിരുവനന്തപുരത്തും അധികമഴ ലഭിച്ചു. അതേസമയം യുഎഇയിൽ രാത്രിയിലും വ്യാഴാഴ്ച രാവിലെയുമായി തീരദേശങ്ങളിൽ ഈർപ്പം വർധിക്കാനും മൂടൽമഞ്ഞിനും സാധ്യതയുണ്ട്. വ്യാഴാഴ്ചയോടെ താപനിലയിൽ നേരിയ കുറവുണ്ടാകാമെങ്കിലും പടിഞ്ഞാറൻ മേഖലകളിൽ ശക്തമായ കാറ്റും പൊടിക്കാറ്റും പ്രതീക്ഷിക്കാം. അറേബ്യൻ ഗൾഫിലും ഒമാൻ കടലിലും കടൽ ശാന്തമായിരിക്കുമെന്നും വെള്ളിയാഴ്ചയും ശനിയാഴ്ചയും ഉച്ചയ്ക്ക് ശേഷം കിഴക്കൻ മേഖലകളിൽ മഴമേഘങ്ങൾ രൂപപ്പെട്ട് ഞായറാഴ്ച വരെ സമാന കാലാവസ്ഥ തുടരുമെന്നും കാലാവസ്ഥാ കേന്ദ്രം വ്യക്തമാക്കി.
