വനിതാ ശിശുവികസന വകുപ്പിന്റെ നേതൃത്വത്തിൽ സ്വാതന്ത്ര്യദിനത്തോടനുബന്ധിച്ച് സംഘടിപ്പിക്കുന്ന ‘റീസർജ് സേഫ് വുമൺ സേഫ് കേരള’ വനിതാ ഒത്തുചേരലിനെതിരെ അധിക്ഷേപ പരാമർശങ്ങളുമായി ഓൾ കേരള മെൻസ് അസോസിയേഷൻ രംഗത്തെത്തി. സംഘടനയുടെ സംസ്ഥാന പ്രസിഡന്റ് വട്ടിയൂർക്കാവ് എസ്. കുമാർ സമൂഹമാധ്യമത്തിൽ പങ്കുവെച്ച വീഡിയോയിലാണ് പരിപാടിയിൽ പങ്കെടുക്കുന്ന സ്ത്രീകൾക്കെതിരെ അങ്ങേയറ്റം സ്ത്രീവിരുദ്ധവും മോശവുമായ പദപ്രയോഗങ്ങൾ നടത്തിയത്. രാത്രിയിൽ നടക്കാനിറങ്ങുന്നവരെ തെരുവ് വേശ്യകളെന്ന് വിശേഷിപ്പിച്ച അദ്ദേഹം, രാത്രികാല കൂട്ടായ്മയെ കാമഭ്രാന്തെന്നും വിശേഷിപ്പിച്ച് അധിക്ഷേപിച്ചു.
അതേസമയം, തിരുവനന്തപുരം എം.ജി റോഡിൽ യൂണിവേഴ്സിറ്റി ജംഗ്ഷൻ മുതൽ ആയുർവേദ കോളേജ് ജംഗ്ഷൻ വരെയാണ് രാത്രി 9.30 മുതൽ ഈ ഒത്തുചേരൽ പ്രോഗ്രാം സംഘടിപ്പിച്ചിരിക്കുന്നത്. ഉദ്ഘാടന സമ്മേളനം യൂണിവേഴ്സിറ്റി കോളേജ് ജംഗ്ഷനിൽ മുഖ്യമന്ത്രി വി.ഡി. സതീശൻ നിർവഹിക്കുമെന്ന് മന്ത്രി ബിന്ദു കൃഷ്ണ അറിയിച്ചു. പ്രവേശനം തികച്ചും സൗജന്യമായ ഈ ജനകീയ കൂട്ടായ്മയിലേക്ക് പ്രിയപ്പെട്ട സഹോദരന്മാർ ഉൾപ്പെടെ എല്ലാവരെയും സർവ്വാത്മനാ സ്വാഗതം ചെയ്യുന്നതായും മന്ത്രി വാർത്താസമ്മേളനത്തിലും സോഷ്യൽ മീഡിയ കുറിപ്പിലും വ്യക്തമാക്കി.
