കൊച്ചി: വെല്ലിംഗ്ടൺ ഐലൻഡിലെ റെയിൽപാതയിൽ നിന്ന് വൻതോതിൽ റെയിൽവേ പാളം മുറിച്ചു കടത്തിയ സംഭവത്തിൽ മൂന്ന് പേരെ എറണാകുളം സൗത്ത് ആർ.പി.എഫ് അറസ്റ്റ് ചെയ്തു. വൈപ്പിൻ മുള്ളയ്ക്കൽ സ്വദേശി പി.കെ. അഫ്സൽ, മട്ടാഞ്ചേരി പഴയ വീട് സ്വദേശി പി.ഐ. താജുദ്ദീൻ, അസം സ്വദേശി ചന്ദ്രശേഖർ മാലിക് എന്നിവരാണ് പിടിയിലായത്. നിലവിൽ ട്രെയിൻ സർവീസുകളില്ലാത്ത, കൊച്ചി പോർട്ട് ട്രസ്റ്റിന്റെ ഉടമസ്ഥതയിലുള്ള റെയിൽപാതയിൽ നിന്നാണ് പ്രതികൾ ഏകദേശം അര കിലോമീറ്ററോളം നീളമുള്ള പാളം മുറിച്ചുമാറ്റിയത്. മോഷണം പോയ ഈ പാളങ്ങൾ ചെറുകഷണങ്ങളാക്കി മാറ്റി വിപണിയിൽ മറിച്ചുവിൽക്കാനുള്ള ശ്രമത്തിനിടെയാണ് പ്രതികൾ വലയിലാകുന്നത്.
തിങ്കളാഴ്ച രാത്രിയോടെ ആലുവ മാർക്കറ്റിന് സമീപത്തുനിന്നാണ് പ്രതികളെ ആർ.പി.എഫ് സംഘം കസ്റ്റഡിയിലെടുത്തത്. ഇവർ സഞ്ചരിച്ചിരുന്ന വാഹനം തടഞ്ഞുനിർത്തി നടത്തിയ വിശദമായ പരിശോധനയിൽ മോഷ്ടിച്ച പാളങ്ങളുടെ നാന്നൂറോളം കഷണങ്ങൾ കണ്ടെത്തുകയായിരുന്നു. പാളം കടത്താൻ പ്രതികൾ ഉപയോഗിച്ച ലോറിയും ഇരുമ്പ് മുറിക്കാൻ ഉപയോഗിച്ച ഗ്യാസ് കട്ടറും ഉദ്യോഗസ്ഥർ സംഭവസ്ഥലത്തുനിന്ന് പിടിച്ചെടുത്തിട്ടുണ്ട്. മോഷണം നടന്ന പ്രദേശങ്ങളിലെ സി.സി.ടി.വി ദൃശ്യങ്ങൾ കേന്ദ്രീകരിച്ച് ആർ.പി.എഫ് നടത്തിയ കൃത്യമായ അന്വേഷണമാണ് പ്രതികളിലേക്ക് എത്തിച്ചത്. റെയിൽവേ പാളങ്ങൾ മുറിച്ച് ആക്രിക്കടകൾ വഴി വിൽക്കാനായിരുന്നു പ്രതികളുടെ പദ്ധതിയെന്ന് ആർ.പി.എഫ് അറിയിച്ചു. സംഭവത്തിൽ കൂടുതൽ പേർക്ക് പങ്കുണ്ടോ എന്നതുൾപ്പെടെയുള്ള കാര്യങ്ങളിൽ അന്വേഷണം പുരോഗമിക്കുകയാണ്.
