ജയ്പൂർ: രാജസ്ഥാനിലെ ദൗസയിൽ ഡൽഹി-മുംബൈ എക്സ്പ്രസ്‌വേയിൽ യാത്രാബസ് ട്രക്കുമായി കൂട്ടിയിടിച്ച് തീപിടിച്ച് ഏഴ് പേർ ദാരുണമായി മരണപ്പെട്ടു. അപകടത്തിൽ 22 പേർക്ക് ഗുരുതരമായി പരിക്കേറ്റിട്ടുണ്ട്. ഇൻഡോറിൽ നിന്നും ഹരിദ്വാറിലേക്ക് തീർത്ഥാടകരുമായി പോയ ബസാണ് നിയന്ത്രണം നഷ്ടമായി എതിരെ വന്ന ട്രക്കുമായി ശക്തമായി ഇടിച്ചത്. ഇടിയുടെ ആഘാതത്തിൽ നിമിഷങ്ങൾക്കകം ബസിന് തീപിടിക്കുകയും ആളിപ്പടരുകയുമായിരുന്നു. ബസിനുള്ളിൽ തീ പടർന്നതിനെ തുടർന്ന് അഞ്ച് യാത്രക്കാർ സംഭവസ്ഥലത്തു തന്നെ വെന്തുമരിക്കുകയായിരുന്നുവെന്നും മറ്റ് രണ്ട് പേർ തലയ്ക്കേറ്റ ഗുരുതരമായ പരിക്കുകൾ കാരണമാണ് മരണമടഞ്ഞതെന്നും പൊലീസ് സ്ഥിരീകരിച്ചു.
അപകടവിവരമറിഞ്ഞ് ദൗസ ജില്ലാ പൊലീസ് സൂപ്രണ്ട് പീയുഷ് ദീക്ഷീത് ഉൾപ്പെടെയുള്ള ഉന്നത ഉദ്യോഗസ്ഥർ ഉടനടി സംഭവസ്ഥലത്തെത്തിയാണ് രക്ഷാപ്രവർത്തനങ്ങൾക്ക് നേരിട്ട് നേതൃത്വം നൽകിയത്. ബസിനുള്ളിൽ നിന്നും പരിക്കുകളോടെ രക്ഷപ്പെടുത്തിയ മറ്റ് 22 യാത്രക്കാരെയും അടിയന്തര ചികിത്സയ്ക്കായി ദൗസ ജില്ലാ ആശുപത്രിയിൽ പ്രവേശിപ്പിച്ചിരിക്കുകയാണ്. അപകടത്തെക്കുറിച്ച് പൊലീസ് വിശദമായ അന്വേഷണം ആരംഭിച്ചിട്ടുണ്ട്.
