വടകരയിലെ ഏറെ വിവാദമായ ‘കാഫിർ സ്ക്രീൻഷോട്ട്’ കേസിൽ അറസ്റ്റിലായ ഡിവൈഎഫ്ഐ നേതാവ് ജിതിൻ ഭാസ്കരന് കനത്ത തിരിച്ചടി. കേസിൽ ജിതിൻ സമർപ്പിച്ച ജാമ്യ ഹർജി തള്ളിയ വടകര ജുഡീഷ്യൽ മജിസ്ട്രേറ്റ് കോടതി, പ്രതിയെ വരും ദിവസങ്ങളിൽ കൂടുതൽ ചോദ്യം ചെയ്യുന്നതിനായി പ്രത്യേക അന്വേഷണ സംഘത്തിന്റെ കസ്റ്റഡിയിൽ വിട്ടു. ഈ മാസം ഇരുപതാം തീയതി വൈകിട്ട് അഞ്ച് മണി വരെയാണ് കോടതി കസ്റ്റഡി അനുവദിച്ചിരിക്കുന്നത്. സോഷ്യൽ മീഡിയയിൽ വലിയ വിദ്വേഷ പ്രചാരണത്തിന് കാരണമായ വിവാദ സ്ക്രീൻ ഷോട്ടിന്റെ യഥാർത്ഥ ഉറവിടം കണ്ടെത്തണമെങ്കിൽ പ്രതിയെ കസ്റ്റഡിയിൽ വാങ്ങി വിശദമായി ചോദ്യം ചെയ്യേണ്ടതുണ്ടെന്ന പ്രോസിക്യൂഷൻ്റെ ശക്തമായ ആവശ്യം പരിഗണിച്ചാണ് കോടതിയുടെ ഈ നടപടി.
അന്വേഷണവുമായി സഹകരിക്കാതെ പ്രതി പല നിർണായക തെളിവുകളും നശിപ്പിച്ചതായും അതിനാൽ കസ്റ്റഡിയിൽ ചോദ്യം ചെയ്യേണ്ടത് അനിവാര്യമാണെന്നും പ്രോസിക്യൂഷൻ കോടതിയെ അറിയിച്ചു. കോടതി ഇത് പൂർണ്ണമായും അംഗീകരിക്കുകയായിരുന്നു. അതേസമയം പ്രോസിക്യൂഷൻ ഉന്നയിച്ച എല്ലാ ആരോപണങ്ങളെയും പ്രതിഭാഗം കോടതിയിൽ ശക്തമായി നിഷേധിച്ചു. വിവാദമായ സ്ക്രീൻഷോട്ട് നിർമ്മിച്ചത് ജിതിൻ ഭാസ്കരനാണെന്നതിന് അന്വേഷണ സംഘത്തിന്റെ പക്കൽ യാതൊരുവിധ കൃത്യമായ തെളിവുകളുമില്ലെന്നും, ആ സ്ക്രീൻഷോട്ടിന്റെ യഥാർത്ഥ ഉറവിടം എവിടെയാണെന്ന് കണ്ടെത്താൻ പോലും പൊലീസിന് ഇതുവരെ സാധിച്ചിട്ടില്ലെന്നുമാണ് പ്രതിഭാഗം വക്കീൽ കോടതിയിൽ വാദിച്ചത്. എങ്കിലും വാദപ്രതിവാദങ്ങൾക്കൊടുവിൽ കോടതി പ്രതിക്ക് ജാമ്യം നിഷേധിച്ച് പൊലീസിന് കസ്റ്റഡി അനുവദിക്കുകയായിരുന്നു.
