മാസപ്പടി കേസിലെ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) റെയ്ഡിനെതിരെ സി.പി.ഐ.എം നടത്തുന്ന പരസ്യ പ്രതിഷേധങ്ങളെയും പ്രക്ഷോഭങ്ങളെയും പിന്തുണയ്ക്കുന്ന കാര്യത്തിൽ എൽ.ഡി.എഫിലെ പ്രധാന ഘടകകക്ഷിയായ സി.പി.ഐക്കുള്ളിൽ കടുത്ത ആശയക്കുഴപ്പവും ഭിന്നാഭിപ്രായവും പുകയുന്നു. വ്യാഴാഴ്ച ചേർന്ന സി.പി.ഐ സംസ്ഥാന സെക്രട്ടേറിയേറ്റ് യോഗത്തിലാണ് പാർട്ടിയിലെ മുതിർന്ന നേതാക്കൾ സി.പി.ഐ.എം നിലപാടിനെതിരെ പരസ്യമായി രംഗത്തുവന്നത്. സ്വന്തമായി ബിസിനസ് നടത്തുന്ന, പ്രതിപക്ഷ നേതാവ് പിണറായി വിജയന്റെ മകൾക്കെതിരെയുള്ള കേസിൽ രാഷ്ട്രീയമായി പാർട്ടി പ്രതിരോധം തീർക്കുന്നതും പ്രതിഷേധിക്കുന്നതും ഒട്ടും ഉചിതമല്ലെന്നാണ് യോഗത്തിൽ ഉയർന്ന പ്രധാന വിമർശനം. ഇ.ഡിക്കെതിരായ സമരങ്ങളിലും പ്രതിഷേധങ്ങളിലും സി.പി.ഐ സംസ്ഥാന നേതൃത്വം അമിതാവേശം കാണിക്കേണ്ടതില്ലെന്ന കർശന നിലപാടിലാണ് ഭൂരിഭാഗം നേതാക്കളും. പാർട്ടിക്കുള്ളിൽ ഇത്തരത്തിൽ ഭിന്നാഭിപ്രായം ശക്തമായതോടെയാണ് കഴിഞ്ഞ ദിവസം സി.പി.ഐ സംസ്ഥാന സെക്രട്ടറി ബിനോയ് വിശ്വം തന്റെ പരസ്യ നിലപാട് മയപ്പെടുത്തിയത്. തിരുവനന്തപുരത്ത് ഇ.ഡി വാഹനങ്ങൾക്ക് നേരെ നടന്ന അക്രമങ്ങളെ സൂചിപ്പിച്ച്, അത്തരം സീനുകൾ ഒഴിവാക്കേണ്ടതായിരുന്നു എന്ന് അദ്ദേഹം പ്രതികരിച്ചിരുന്നു. ഇതിനുപുറമേ, ഇ.ഡി റെയ്ഡ് മുഖ്യമന്ത്രി വി. ഡി. സതീശനും ബി.ജെ.പിയും തമ്മിലുള്ള രഹസ്യ ഗൂഢാലോചനയുടെ ഭാഗമാണെന്ന സി.പി.ഐ.എമ്മിന്റെ രാഷ്ട്രീയ വാദവും സി.പി.ഐ ഏറ്റെടുക്കാൻ തയ്യാറായില്ല. ഈ ഗൂഢാലോചന ആരോപണത്തെക്കുറിച്ച് ഇപ്പോൾ ഒന്നും പറയാനില്ലെന്നായിരുന്നു ബിനോയ് വിശ്വത്തിന്റെ മറുപടി.
മകൾ പിണറായി വിജയന്റെ ഒപ്പമാണ് നിലവിൽ താമസിക്കുന്നത് എന്നതുകൊണ്ടാണ് ഇ.ഡി സംഘത്തിന് അദ്ദേഹത്തിന്റെ വീട്ടിലേക്ക് പരിശോധനയ്ക്കായി എത്തേണ്ടി വന്നതെന്ന് ചില പ്രമുഖ നേതാക്കൾ യോഗത്തിൽ ചൂണ്ടിക്കാട്ടി. സ്വന്തമായി ബിസിനസ് നടത്തുന്ന മകൾ പിതാവിനൊപ്പം താമസിക്കുന്നത് ശരിയാണോ എന്ന ചോദ്യവും യോഗത്തിൽ ഉയർന്നു. ഈ വിഷയത്തിൽ സി.പി.ഐ.എമ്മിന് അനുകൂലമായി വലിയ ജനവികാരമുണ്ടെന്ന് പറയുന്നതിൽ യാതൊരു അർത്ഥവുമില്ല. അന്വേഷണം നേരിട്ട് പിണറായി വിജയനെതിരെ ആയിരുന്നെങ്കിൽ അതിനെ രാഷ്ട്രീയമായി ശക്തമായി പ്രതിരോധിക്കാമായിരുന്നു. എന്നാൽ മകൾക്കെതിരെയുള്ള കേസിൽ അവർക്ക് വേണമെങ്കിൽ നിയമപരമായ പിന്തുണ നൽകാം എന്നല്ലാതെ, രാഷ്ട്രീയപരമായി മുന്നണി സംവിധാനം ഉപയോഗിച്ച് പ്രതിരോധിക്കാൻ ഇറങ്ങുന്നത് മുന്നണിയുടെ പ്രതിച്ഛായയ്ക്ക് തന്നെ ദോഷം ചെയ്യുമെന്നും അനുചിതമാണെന്നുമാണ് സി.പി.ഐ സെക്രട്ടേറിയേറ്റിൽ ഉയർന്ന പൊതുവികാരം. ഘടകകക്ഷിക്കുള്ളിൽ രൂപപ്പെട്ട ഈ ആഭ്യന്തര ഭിന്നത വരും ദിവസങ്ങളിൽ ഇടതുമുന്നണിയിൽ പുതിയ രാഷ്ട്രീയ ചർച്ചകൾക്ക് വഴിതുറക്കും.
