കേരള രാഷ്ട്രീയത്തിൽ പുതിയൊരു അധ്യായം കുറിച്ചുകൊണ്ട് സംസ്ഥാനത്തിന്റെ പതിമൂന്നാമത് മുഖ്യമന്ത്രിയായി വി.ഡി. സതീശൻ സത്യപ്രതിജ്ഞ ചെയ്ത് അധികാരമേറ്റു. തിരുവനന്തപുരം സെൻട്രൽ സ്റ്റേഡിയത്തിൽ വെച്ച് നടന്ന വിപുലമായ ചടങ്ങിൽ ഗവർണർ രാജേന്ദ്ര വിശ്വനാഥ് ആർലേക്കർ മുഖ്യമന്ത്രിക്ക് സത്യവാചകം ചൊല്ലിക്കൊടുത്തു. ദൈവനാമത്തിലായിരുന്നു സതീശന്റെ സത്യപ്രതിജ്ഞ. മുഖ്യമന്ത്രിക്ക് പുറമെ യുഡിഎഫ് മന്ത്രിസഭയിലെ മറ്റ് 20 മന്ത്രിമാരും ഇതേ വേദിയിൽ വെച്ച് സത്യപ്രതിജ്ഞ ചെയ്ത് ചുമതലയേറ്റു. പുതിയ സർക്കാരിന്റെ ഈ ചരിത്ര മുഹൂർത്തത്തിന് സാക്ഷ്യം വഹിക്കാൻ സ്റ്റേഡിയത്തിനകത്തും പുറത്തുമായി പതിനായിരക്കണക്കിന് ആളുകളാണ് തലസ്ഥാന നഗരിയിലേക്ക് ഒഴുകിയെത്തിയത്. എഐസിസി അധ്യക്ഷൻ മല്ലികാർജുൻ ഖാർഗെ, കോൺഗ്രസ് നേതാക്കളായ രാഹുൽ ഗാന്ധി എംപി, പ്രിയങ്ക ഗാന്ധി എംപി എന്നിവർക്ക് പുറമെ കർണാടക മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി.കെ. ശിവകുമാർ, തെലങ്കാന മുഖ്യമന്ത്രി രേവന്ത് റെഡ്ഡി തുടങ്ങിയ പ്രമുഖ ദേശീയ നേതാക്കൾ ചടങ്ങിന് പ്രൗഢിയേകി. പുതിയ പ്രതിപക്ഷ നേതാവ് പിണറായി വിജയൻ ഉൾപ്പെടെയുള്ള പ്രതിപക്ഷ പാർട്ടി നേതാക്കൾക്കും സത്യപ്രതിജ്ഞാ വേദിയിൽ തന്നെ പ്രത്യേക ഇരിപ്പിടങ്ങൾ ഒരുക്കിയത് ഭരണ-പ്രതിപക്ഷ സൗഹൃദത്തിന്റെ വേറിട്ട കാഴ്ചയായി.
മുഖ്യമന്ത്രിക്ക് ശേഷം മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടിയാണ് രണ്ടാമതായി സത്യപ്രതിജ്ഞ ചെയ്തത്. തൊട്ടുപിന്നാലെ കോൺഗ്രസ് നേതാക്കളായ രമേശ് ചെന്നിത്തലയും കെപിസിസി പ്രസിഡന്റ് സണ്ണി ജോസഫും അധികാരമേറ്റു. ഇവരെക്കൂടാതെ കെ. മുരളീധരൻ, ബിന്ദു കൃഷ്ണ, എ.പി. അനിൽ കുമാർ, പി.സി. വിഷ്ണുനാഥ്, എം. ലിജു, റോജി എം. ജോൺ, ടി. സിദ്ദിഖ്, ഒ.ജെ. ജനീഷ്, കെ.എ. തുളസി എന്നിവരാണ് കോൺഗ്രസിൽ നിന്ന് മന്ത്രിമാരായത്. ഘടകകക്ഷികളിൽ നിന്ന് മുസ്ലിം ലീഗിന്റെ എൻ. ഷംസുദ്ദീൻ, പി.കെ. ബഷീർ, കെ.എം. ഷാജി, അബ്ദുൾ ഗഫൂർ എന്നിവരും ആർഎസ്പി നേതാവ് ഷിബു ബേബി ജോൺ, സിഎംപിയിലെ സി.പി. ജോൺ, കേരള കോൺഗ്രസ് ജോസഫ് വിഭാഗത്തിലെ മോൻസ് ജോസഫ് എന്നിവരും മന്ത്രിമാരായി സത്യപ്രതിജ്ഞ ചെയ്തു. ഇതിൽ അനൂപ് ജേക്കബും മാണി സി. കാപ്പനും ടേം വ്യവസ്ഥയിലാണ് മന്ത്രിസ്ഥാനം പങ്കിടുന്നത്; ആദ്യ രണ്ടര വർഷം അനൂപ് ജേക്കബും തുടർന്ന് മാണി സി. കാപ്പനും മന്ത്രിമാരാകും. മുന്നണി ധാരണപ്രകാരം തിരുവഞ്ചൂർ രാധാകൃഷ്ണനെ സ്പീക്കർ സ്ഥാനാർത്ഥിയായും ഷാനിമോൾ ഉസ്മാനെ ഡെപ്യൂട്ടി സ്പീക്കർ സ്ഥാനാർത്ഥിയായും യുഡിഎഫ് നിശ്ചയിച്ചിട്ടുണ്ട്.
സത്യപ്രതിജ്ഞാ ചടങ്ങുകൾ പൂർത്തിയായെങ്കിലും മന്ത്രിമാരുടെ വകുപ്പ് വിഭജനവുമായി ബന്ധപ്പെട്ട അന്തിമ ചർച്ചകൾ അണിയറയിൽ സജീവമാണ്. ഘടകകക്ഷികളുടെയും കോൺഗ്രസ് മന്ത്രിമാരുടെയും വകുപ്പുകളിൽ ചില അഴിച്ചുപണികൾക്ക് സാധ്യതയുണ്ടെന്നാണ് ലഭിക്കുന്ന വിവരം. തനിക്ക് നൽകാൻ നിശ്ചയിച്ചിരുന്ന വൈദ്യുതി വകുപ്പിനോട് താല്പര്യമില്ലെന്ന് കെ. മുരളീധരൻ മുന്നണി നേതൃത്വത്തെ ഔദ്യോഗികമായി അറിയിച്ചിട്ടുണ്ട്. പകരം ആരോഗ്യവും ദേവസ്വവും വേണമെന്ന അദ്ദേഹത്തിന്റെ ആവശ്യം പുതിയ മുഖ്യമന്ത്രിയും ഹൈക്കമാൻഡും തത്വത്തിൽ അംഗീകരിച്ചതായാണ് സൂചന. വരും മണിക്കൂറുകളിൽ തന്നെ മന്ത്രിമാരുടെ വകുപ്പുകൾ സംബന്ധിച്ച ഔദ്യോഗിക വിജ്ഞാപനം പുറത്തിറങ്ങും.
