രാജ്യത്ത് പെട്രോളിനും ഡീസലിനും ലിറ്ററിന് മൂന്ന് രൂപ വീതം വർദ്ധിപ്പിച്ച കേന്ദ്ര സർക്കാർ നടപടിക്കെതിരെ കടുത്ത വിമർശനവുമായി സിപിഐഎം പോളിറ്റ് ബ്യൂറോ അംഗം പിണറായി വിജയൻ രംഗത്തെത്തി. അന്താരാഷ്ട്ര വിപണിയിൽ ക്രൂഡ് ഓയിലിന് വില കുറഞ്ഞ സമയത്ത് അതിന്റെ ആനുകൂല്യം ജനങ്ങൾക്ക് നൽകാതിരുന്ന കേന്ദ്രം, ഇപ്പോൾ എണ്ണക്കമ്പനികളുടെ നഷ്ടം മറയാക്കി ജനങ്ങളുടെ മേൽ അമിതഭാരം അടിച്ചേൽപ്പിക്കുകയാണെന്ന് അദ്ദേഹം കുറ്റപ്പെടുത്തി. ഈ വിലക്കയറ്റം ഒരുവിധത്തിലും ന്യായീകരിക്കാൻ കഴിയാത്തതാണെന്നും തെറ്റായ ഭരണനയങ്ങൾ മൂലം പാചകവാതക ക്ഷാമവും വിലവർദ്ധനവും കൊണ്ട് ഇതിനകം തന്നെ ദുരിതത്തിലായ ജനജീവിതത്തെ ഇത് കൂടുതൽ പ്രതിസന്ധിയിലാക്കുമെന്നും അദ്ദേഹം പ്രസ്താവനയിൽ ചൂണ്ടിക്കാട്ടി.
ഇന്ധനവിലയിലുണ്ടായ ഈ വർദ്ധനവ് വരും ദിവസങ്ങളിൽ ഗതാഗതച്ചെലവും നിത്യോപയോഗ സാധനങ്ങളുടെ വിലയും കുതിച്ചുയരാൻ ഇടയാക്കുമെന്ന ആശങ്കയും അദ്ദേഹം പങ്കുവെച്ചു. ഇത്തരം ജനവിരുദ്ധ നടപടികളുടെ യഥാർത്ഥ ദുരിതം അനുഭവിക്കേണ്ടി വരിക സാധാരണക്കാരായ തൊഴിലാളികളും കർഷകരും ഇടത്തരം കുടുംബങ്ങളുമായിരിക്കും. കൃത്യമായ നയങ്ങളിലൂടെയും ഫലപ്രദമായ ഇടപെടലുകളിലൂടെയും ജനങ്ങൾക്ക് ആശ്വാസം നൽകേണ്ടതിന് പകരം കോർപ്പറേറ്റുകളെ സംരക്ഷിക്കാനാണ് കേന്ദ്ര സർക്കാർ ശ്രമിക്കുന്നത്. ജനങ്ങളെ കൊള്ളയടിക്കുന്ന ഈ അന്യായമായ തീരുമാനം കേന്ദ്ര സർക്കാർ അടിയന്തരമായി പിൻവലിക്കണമെന്നും പിണറായി വിജയൻ ആവശ്യപ്പെട്ടു.
