സ്ത്രീ ശാക്തീകരണത്തിന്റെ ഭാഗമായി രാജ്യം ഇന്ന് ചരിത്രപരമായ നടപടികളിലേക്ക് കടക്കുകയാണെന്നും അമ്മമാരെയും സഹോദരിമാരെയും ആദരിക്കുന്നത് രാഷ്ട്രത്തിന്റെ ബഹുമതിയാണെന്നും പ്രധാനമന്ത്രി നരേന്ദ്ര മോദി പ്രഖ്യാപിച്ചു. വനിതാ സംവരണ ബില്ലിന്മേൽ സർക്കാർ ഉറച്ചുനിൽക്കുകയാണെന്നും ഈ ദിശയിലുള്ള ശക്തമായ ചുവടുവെപ്പാണ് വരാനിരിക്കുന്നതെന്നും പാർലമെന്റിന്റെ പ്രത്യേക സമ്മേളനത്തിന് മുന്നോടിയായി അദ്ദേഹം പറഞ്ഞു. എന്നാൽ, ലോക്സഭാ സീറ്റുകളുടെ എണ്ണം 850 ആയി വർദ്ധിപ്പിച്ചുകൊണ്ട് വനിതാ സംവരണം നടപ്പിലാക്കാനുള്ള കേന്ദ്ര നീക്കത്തെ പാർലമെന്റിൽ ഒറ്റക്കെട്ടായി നേരിടാനാണ് പ്രതിപക്ഷ പാർട്ടികളുടെ തീരുമാനം. പ്രത്യേക സമ്മേളനത്തിൽ അവതരിപ്പിക്കുന്ന മൂന്ന് ബില്ലുകളെയും എതിർക്കാൻ തീരുമാനിച്ച പ്രതിപക്ഷം, പുതിയ ഭേദഗതികളില്ലാതെ നിലവിലുള്ള വനിതാ സംവരണ ബിൽ അതേപടി നടപ്പിലാക്കണമെന്ന ആവശ്യമാണ് മുന്നോട്ടുവെക്കുന്നത്.
മണ്ഡല പുനർനിർണ്ണയത്തിലൂടെ സീറ്റുകളുടെ എണ്ണം വർദ്ധിപ്പിക്കുന്നത് തിരക്കിട്ട് നടത്തേണ്ട ഒന്നല്ലെന്ന നിലപാടിലാണ് പ്രതിപക്ഷം. മല്ലികാർജുൻ ഖർഗെ ഉൾപ്പെടെയുള്ള നേതാക്കൾ സ്ത്രീ സംവരണത്തെ സ്വാഗതം ചെയ്യുന്നുണ്ടെങ്കിലും, ഇപ്പോഴത്തെ സർക്കാർ നീക്കം രാഷ്ട്രീയ ലക്ഷ്യങ്ങൾ മുൻനിർത്തിയുള്ളതാണെന്ന് ആരോപിക്കുന്നു. പ്രത്യേകിച്ച്, ഈ നടപടി ദക്ഷിണേന്ത്യൻ സംസ്ഥാനങ്ങൾക്ക് ലോക്സഭയിലുള്ള പ്രാതിനിധ്യം കുറയ്ക്കാൻ ഇടയാക്കുമെന്ന ആശങ്കയും പ്രതിപക്ഷം പങ്കുവെക്കുന്നുണ്ട്. എന്നാൽ ദക്ഷിണേന്ത്യൻ സംസ്ഥാനങ്ങൾക്ക് യാതൊരുവിധ തിരിച്ചടിയും ഉണ്ടാകില്ലെന്ന് കേന്ദ്ര സർക്കാർ ആവർത്തിച്ചു വ്യക്തമാക്കുന്നു. ഭരണഘടനാ ഭേദഗതി പാസാക്കാൻ മൂന്നിൽ രണ്ട് ഭൂരിപക്ഷം ആവശ്യമാണെന്നിരിക്കെ, പ്രതിപക്ഷം ശക്തമായി എതിർത്താൽ അത് സർക്കാരിന് വലിയ വെല്ലുവിളിയാകും. മണ്ഡല പുനർനിർണ്ണയം ഒഴിവാക്കി സംവരണം നടപ്പിലാക്കാനുള്ള ബദൽ നിർദ്ദേശങ്ങൾ ചർച്ചയിൽ ഉന്നയിക്കാനാണ് പ്രതിപക്ഷ നീക്കം.
