രാജ്യത്ത് പണപ്പെരുപ്പവും വിലക്കയറ്റവും രൂക്ഷമാകുന്ന സാഹചര്യത്തിൽ, ഒക്ടോബറിൽ നടക്കുന്ന പണനയ അവലോകന യോഗത്തിൽ റിസർവ് ബാങ്ക് ഓഫ് ഇന്ത്യ റിപ്പോ നിരക്ക് കാൽ ശതമാനം (25 ബേസിസ് പോയിന്റ്) ഉയർത്തിയേക്കും. റോയിട്ടേഴ്‌സ് നടത്തിയ സർവേയിൽ പങ്കെടുത്ത ഭൂരിഭാഗം സാമ്പത്തിക വിദഗ്ധരും ഈ അഭിപ്രായമാണ് പങ്കുവെച്ചത്. നിർദ്ദിഷ്ട വർദ്ധനവ് നിലവിൽ വന്നാൽ അടിസ്ഥാന പലിശ നിരക്ക് 5.50 ശതമാനമായി ഉയരും. ഒക്ടോബർ 5 മുതൽ 7 വരെ നടക്കുന്ന യോഗത്തിൽ ആർ.ബി.ഐ ഈ തീരുമാനമെടുത്താൽ, 2023 ഫെബ്രുവരിക്ക് ശേഷമുള്ള ആദ്യത്തെ നിരക്ക് വർദ്ധനവായിരിക്കും ഇത്. പണപ്പെരുപ്പ സമ്മർദ്ദം തുടർന്നാൽ ഡിസംബറിലും നിരക്ക് വീണ്ടും കൂട്ടിയേക്കുമെന്നാണ് വിലയിരുത്തൽ. ഇത് സാധാരണക്കാരുടെ ഭവന, വാഹന വായ്പകളുടെ ഇ.എം.ഐ ഭാരം വർദ്ധിപ്പിക്കും.
മിഡിൽ ഈസ്റ്റിലെ സംഘർഷങ്ങളെ തുടർന്ന് ഊർജ്ജ വില കുതിച്ചുയരുന്നതും ഡോളറിനെതിരെ രൂപയുടെ മൂല്യം ആറ് ശതമാനത്തോളം ഇടിഞ്ഞതുമാണ് റിസർവ് ബാങ്കിനെ ഇത്തരം ഒരു തീരുമാനത്തിലേക്ക് നയിക്കുന്നത്. ഓഗസ്റ്റിൽ രാജ്യത്തെ പണപ്പെരുപ്പം 4.82 ശതമാനമായി ഉയർന്നിരുന്നു. തുടർച്ചയായ മൂന്നാം മാസമാണ് പണപ്പെരുപ്പം ആർ.ബി.ഐയുടെ ലക്ഷ്യപരിധിയായ നാല് ശതമാനത്തിന് മുകളിൽ നിൽക്കുന്നത്. കറൻസിയുടെ മൂല്യത്തകർച്ച തടയാനും അമേരിക്കൻ ഫെഡറൽ റിസർവ് അടക്കമുള്ള ആഗോള കേന്ദ്ര ബാങ്കുകളുടെ പലിശവർദ്ധനവ് സൃഷ്ടിക്കുന്ന പ്രതിസന്ധി മറികടക്കാനും പലിശ നിരക്ക് ഉയർത്തുകയല്ലാതെ റിസർവ് ബാങ്കിന് മറ്റ് വഴികളില്ലെന്നാണ് സാമ്പത്തിക വിദഗ്ധരുടെ നിരീക്ഷണം.
