പ്രതിഷേധിച്ച വിദ്യാർത്ഥികളെ സോഷ്യൽ മീഡിയയിലൂടെ അധിക്ഷേപിച്ച കേസിൽ ആർ.എസ്.എസ് સહയാത്രികൻ ടി.ജി. മോഹൻദാസിന് തിരുവനന്തപുരം എ.സി.ജെ.എം കോടതി ഉപാധികളോടെ ജാമ്യം അനുവദിച്ചു. സമരം ചെയ്ത വിദ്യാർത്ഥിനികൾക്കെതിരെ ഉൾപ്പെടെ അധിക്ഷേപ പരാമർശം നടത്തിയ സംഭവത്തിൽ ഇന്നലെ എറണാകുളം മട്ടാഞ്ചേരിയിലെ വീട്ടിൽ നിന്നാണ് തിരുവനന്തപുരം സിറ്റി സൈബർ പോലീസ് ഇയാളെ കസ്റ്റഡിയിലെടുത്തത്.
തുടർന്ന് പുലർച്ചെയോടെ തിരുവനന്തപുരത്ത് എത്തിച്ചശേഷം വിശദമായി ചോദ്യം ചെയ്യുകയായിരുന്നു. കലാപ ആഹ്വാനം അടക്കമുള്ള വകുപ്പുകൾക്ക് പുറമേ ലഭിച്ച കൂടുതൽ പരാതികളുടെ അടിസ്ഥാനത്തിൽ സ്ത്രീത്വത്തെ അപമാനിച്ചതിനുള്ള കുറ്റവും ഇയാൾക്കെതിരെ പോലീസ് ചുമത്തിയിരുന്നു. പരിശോധനയിൽ ടി.ജി. മോഹൻദാസിന്റെ മൊബൈൽ ഫോണിൽ നിന്ന് അധിക്ഷേപ വീഡിയോ കണ്ടെത്തുകയും അത് സ്വന്തമായി റെക്കോർഡ് ചെയ്ത് അപ്‌ലോഡ് ചെയ്തതാണെന്ന് പോലീസ് സ്ഥിരീകരിക്കുകയും ചെയ്തിട്ടുണ്ട്. അതേസമയം, കേസിൽ നടപടി നേരിട്ട ടി.ജി. മോഹൻദാസിന് പിന്തുണയുമായി ബി.ജെ.പി നേതാക്കൾ രംഗത്തെത്തിയിരുന്നു.
